Mi kier kuminsá awe ku bon notisia, menshonando ku e último 13 dianan ku a pasa no tabatin ningun kaso nobo di COVID-19 na nos isla. Mi ta hopi kontentu ku e logro akí. Pa mi esaki ta prueba, ku si nos tur uni forsa i kumpli ku e reglanan di higiena i distansia sosial, nos por frena plamamentu di e vírùs riba nos isla. Esaki ta nifiká tambe ku awor ta ora pa paso pa paso nos kuminsá adaptá i òf suavisá e reglanan ku ta na vigor aktualmente. Manera por ehèmpel e reglanan pa pasahero ku ke biaha di Hulanda òf Kòrsou bini Boneiru. I tambe e reglanan ku tabata konta pa nos aki na Boneiru.
Awor nos por puntra, dikon esaki mester bai paso pa paso? E kontesta ta pasombra nos sa unda nos ke bai. Nos ke mantené e situashon kaminda nos tin tiki kaso di hende ku a pega ku e vírùs. Nos ke ta den un sitashon kaminda nos por kontrolá i manehá e kantidat di kasonan di COVID-19.Ta p’esei nos no ta bai kambia tur kos den un tiru i na grandi. Loke nos ta bai hasi ta trese poko poko algun kambio i wak kon esei ta bai resultá den práktika. Nos mester tene kuenta tambe kon situashon di COVID-19 ta desaroyá den e paisnan for di kual normal tin basta pasahero ta bini Boneiru. Periódikamente nos lo wak kon kosnan ta kanando promé ku nos bini ku mas kambio.
Nos ta distinguí 6 fase den e krísis di corona, i e riesgonan ku nan ta enserá. Tin un skema kaminda ta splika pa kada fase kiko ta e medidanan ku ta drenta na vigor e ora ei. Den fase number 1 situashon ta stabil i no tin niun kaso di hende ku a pega ku e vírùs. E riesgo ku tin hende di afo ta pega hende lokal ku e vírùs ta chikitu. Den e fase akí e úniko reglanan ta esnan di higiena i di tene bo mes na distansia di 1,5 mei. Den e delaster fase, esun di seis tin un brote masal di e vírùs i nos mester bai den un lockdown. Den e periodo ku ta tras di lomba nos tabata den fase 4. Djaluna 26 di òktober awor nos ta pasa ofisialmente di fase 4 pa fase 3 ku e reglanan ku ta korespondé ku e fase ei. Por haña e skema riba nos website www.boneirukrisis.com. Pronto nos ta bai publiká mas splikashon detayá di e skema riba nos site.
Mi ke papia awor di e kambionan ku ta na kaminda. Pa kuminsá nos a hasi un petishon ayera na ministerio di Relashon Eksterior di Hulanda, pa Boneiru bira un destinashon ku kódigo hel. Awor aki ainda Boneiru tin kódigo oraño. Asina ku nos sa kiko ta resultado, mi ta informá boso di esei.
Pasahero for di Kòrsou por bini Boneiru ku avion òf boto entrante djaluna 26 di òktober benidero, basta nan a hasi e PCR tèst pa mas tardá 72 ora promé ku e buelo i resultado di e tèst ta negativo . Nan mester tin un deklarashon di salú tambe di Salubridat Públiko di Boneiru. Por haña esaki riba nos website òf pidi unu na publichealth@bonairegov.com.
Por lo pronto lo tin di djaluna te ku djaweps 4 buelo pa dia for di Kòrsou.
Pasahero di Boneiru por biaha bai Kòrsou.Ora di bin Boneiru bèk nan mester laga hasi e PCR tèst na Kòrsou pa mas tardá 72 ora promé ku nan buelo. E resultado mester ta negativo. Ora nan bini Boneiru bèk nan no tin nodi di bai den karentena.
Pasaheronan di Statia i Saba por biaha bin nos isla sin tèst di PCR. Statia i Saba ta forma huntu ku nos isla un asina yamá bubble. Ke men un área den kua ta seif pa biaha.
Pasaheronan di Aruba, Sint Maarten, Canada i Merka por bini Boneiru, via Korsou basta nan hasi e PCR tèst pa mas tardá promé ku nan buelo i resultado di e tèst ta negativo. Nan tambe mester yena e deklarashon di salú di departamento di Salubridat Públiko.
Ta prologá prohibishon pa buelo direkt for di Merka ku dos siman te medio novèmber.
Si e kondishonnan keda bon, nos por suavisá mas ainda i habri pa mas pais ora esaki ta responsabel. Ku esaki mi kier duna un perspektiva na nos sektor turístiko.
Ta bai remplasá e ordenansa di emergensia ku ta na vigor awor pa un otro. E ordenansa di emergensia nobo ta drenta na vigor djaluna 26 di òktober 2020 i e ta bálido te ku 15 di novèmber 2020. Ta nesesario pa bini ku un ordenansa di emergensia nobo, ya ku ta asina por regla por ehèmpel e kondishonnan pa pasahero ku ke bini Boneiru.
Entrante djaluna 26 di òktober 2020 kasino i skol di deporte tin mag di habri atrobe si nan tene nan mes na instrukshon di departamento di Salubridat Públiko. Siman pasá a hiba kombersashon ku algun di nan. Si nan ke habri mas trempan, nan por hasi esei despues di un kontrol di inspektor di Supervishon i Mantenshon.
Pa loke ta trata trabou, ta konsehá pa sigui traha mas tantu ku ta posibel for di kas.
Promé ku mi finalisá mi ke bisa lo siguiente. Si tin algu ku nos a siña den e lunanan ku ta tras di lomba, esei ta ku nos ta bon prepará pa atendé ku e situashon di krísis. Nos a pasa den tempu kaminda tabatin basta hende ku a pega ku e vírùs. Tur esei nos a sa di superá. Danki pa boso koperashon ounke tin biaha kisas no tabata fásil pa kumpli ku e reglanan.
Mi ke pidi tur hende pa ta konsiente ku nos lo por sigui suavisá e medidanan solamente si nos sigui kumpli. Esta kumpli ku e reglanan di higiena, tosa i nister den bo èlebog, mantené distansia sosial di 1,5 meter. I evitá pa ta den grupo grandi di hende. Ta asina so nos por sigui lucha kontra e vírùs di corona. Mi ta konta ku boso tur. Protehá bo mes i bo sernan kerí. Huntu nos por. Huntu nos ta logra kontra corona.