Prome minister Evelyn Wever Croes awe a reacciona riba e mocion di desconfiansa pasa siman pasa diahuebs den parlamento contra Marisol Lopez Tromp (POR). Un mocion cu ta bisa hopi mes y cu un mandatario lo mester saca su cuenta, por lo menos na Hulanda e mandatario lo a tuma su honor.
Scuchando e declaracion graba di e prome minister, por a nota cu e mes, aunke e hecho a sosode for di diahuebs anochi, no a logra papia cu Lopez Tromp. Manera ta conoci, e reunion di Conseho di Minister di diabierna a wordo cancela y den fin di siman e lider di Gobierno a dedica tempo na famia y entiero di un omo di dje.
Pero, asina mes el a tuma nota di loke a pasa y e no a logra papia cu Marisol ainda. E mandatario porcierto awe tin un audiencia cu Gobernador.
Prome minister a señala riba loke Constitucion ta bisa, cu Parlamento ta dicidi, den un mocion si no tin confiansa mas den un minister. E ora e mester tuma honor na su mes. Pero sin bay riba e hecho cu si e mocion ta legal of no, cu tin un mocion treci contra un mandatario ta mustra y bisa hopi caba. Cu Wever Croes ta cansa di e situacion por a nota den cada palabra cu el a expresa den e discurso breve aki manda pa prensa. Aunke e ta bisa na mesun momento cu e mester papia cu su colega ainda pa scucha su banda.
E ta bisa di por compronde e parlamentarionan pasobra ta 3 of 4 biaha a yama e ministernan pa busca un solucion cu e grupo aki por sigui tira pisca y pone cuminda riba mes pa nan famia. Pero parlamento tambe a haci un apelacion na gobierno en general pa busca un solucion. No mester lubida cu Parlamento ta hefe di Gobierno, ta controla e ministernan. Y mester tin algo robes si un parlamento mester yama un of mas minister 3 pa 4 biaha pa yega na un solucion.
Prome minister a bisa cu e no sa kico por a bay malo, pasobra e ultimo cu e tabata na altura di dje ta cu dos dia prome cu e reunion di parlamento, nan tur tabata riba e mesun linea pa e solucion pa e piscadonan. “Si ta ami tabata envolvi y si tin algo a cambia na caminda, y si di berdad mi tabata kier un solucion, lo mi a comunica cu prome minister riba e situacion aki.” Cu e expresion aki e mandatario indirectamente ta señala un biaha mas e falta di comunicacion di Marisol Lopez Tromp pa cu su coleganan. Un falta di comunicacion cu e politico aki, cu a pasa den diferente parti, ta wordo señala di tin.
El a bisa tambe den su declaracion cu por mira den e situacion aki cu ni e fraccion cu a pone Marisol Lopez Tromp como minister ni a fraccion mas grandi den e coalicion a demostra awo di no tin confiansa mas den dje y esnan di oposicion tampoco a bisa di tin confiansa den dje. “Na Hulanda, un minister cu no tin apoyo di su fraccion, lo a tuma honor na su mes pa hopi tempo caba.”
Pero tambe el a bisa cu el a pidi tur e ministernan pa evita mas crisis innecesario den Gobierno pasobra tin masha reto pa enfrenta
Dos dia prome cu e reunion di parlamento, nan tur tabata riba e mesun linea pa e solucion pa e piscadonan
