Un di e metanan di Departamento di Asuntonan Economico, Comercio y Industria (DEZHI) ta pa promove y stimula inversionnan y alabes desaroya y implementa un maneho di inversion atractivo pa promove Aruba cu un desaroyo economico sostenibel pa inversionistanan local y internacional. Pa haci esaki DEZHI ta introduci un plataforma di ‘Investment’ riba su website www.deaci.aw
Portal di inversion
Un di e metanan di Gobierno ta pa diversifica Aruba su economia por medio di e seis sector prometedor. Minister Xiomara Maduro ta informa cu Pais Aruba ta duna un ‘red carpet treatment’ pa atrae inversionistanan cu kier inverti den e sectornan prometedor. Riba e portal di inversion DEZHI a inventarisa tur informacion necesario y importante pa un inversionista cu kier inverti den nos Pais. Pa facilita e proceso a inclui un formulario cu e potencial inversionista por yena y manda su informacion pa asina e profesionalnan di DEZHI por duna e asistencia necesario.
Expertonan den inversion
E dignatario ta sigui bisa cu DEZHI ta ekipa cu expertonan cu por guia e inversionista door di henter e proceso di inversion y ta actua como facilitador pa e inversionista. Alabes e departamento ta yuda e potencial inversionista cu informacion tocante e permitnan necesario pa por realisa nan inversion den Pais Aruba. E profesionalnan na DEZHI tin un network amplio localmente, den Reino y rond mundo. DEZHI ta conta tambe cu asistencia di embahada y consulado den Reino, Foreign Investment Agency di Hulanda, Holland House na Colombia y otro organisacionan den Caribe.
Minister Xiomara Maduro ta subraya cu e hecho cu DEZHI ta maneha e plataforma digitalisa di inversion ta haci cu e inversionista ta ricibi tur informacion necesario bou di un dak. Cu e portal aki DEZHI kier engrandece Aruba su potencial internacionalmente pa inversion y haya atencion di e inversionista. DEZHI ta sigui traha continuamente pa atrae proyectonan y inversionistanan cu por contribui y yuda diversifica y reactiva nos economia.
