Diamars Prome Minister Evelyn Wever-Croes y Minister di Husticia Andin Bikker a asisti na e reunion publico den Parlamento riba e topico di Integridad. Prome Minister durante e reunion a elabora riba e 10 pilarnan cu Gabinete Wever-Croes a bin ta trahando riba dje pa garantisa integridad den Gobierno.
BUREAU INTEGRITEIT ARUBA (BIA):
E prome pilar ta Bureau Integriteit Aruba (BIA). Ora Gabinete Wever-Croes a drenta gobierno a introduci loke nan ta yama un “Klankbordgroep Integriteit’ cual ta un grupo di persona cu ta duna conseho y tey pa yuda den e proceso. Den e grupo aki a ser apunta Procurador General, Hefe di Nationaal Veiligheidsdienst Aruba, Director di DRH, y e director di Centrale Accountings Dienst. Hunto nan a traha pa asina introduci Bureau Integriteit Aruba.
Prome Minister a enfatisa cu e meta principal di BIA ta prevencion. Pa preveni empleadonan di haña nan den problema sin cu tin mester mirando cu nos Arubianonan ta gusta yuda otro; pa aumenta conscientisacion dunando curso y charla; y pa fortifica organisacionnan cu reglanan cla pa tur hende sa kico por y kico no por, y pa si en caso tal un persona haci algo cu no mag, kico ta e sancionnan cu lo bin como resultado.
Tambe BIA lo sirbi como un punto di notificacion pa casonan di corpucion. Akinan personanan por yama y denuncia casonan di kiebro di integridad den nan area di trabouw. Una ves un persona yama, BIA lo verwijs e keho aki na e departamneto concerni. Si acaso ta un caso disciplinario, e ambtenaar en cuestion lo ser manda pa departamento di recurso humano. Si e caso ta mustra claramente cu ta violacion di un caso penal, e ora e caso lo bay Ministerio Publico pa investigacion. No solamente BIA lo manda e keho aden pa e departamento concerni, sino tambe lo haci siguimento pa wak si investigacion en realidad ta tumando luga.
BIA lo fungi como centro pa ‘klokkenluiders’ pa asina tur hende por manda denuncia aden si nan no a wordo trata di un manera integro of si nan sa di casonan no integro cu ta tumando luga, hañando e proteccion necesario.
Per 1 november e hefe lo wordo apunta hunto cu parti di e ekipo cu lo cuminsa labora. E edificio tey caba, muebla, y full ekipa cu IT, cu a wordo prepara pa e kwartiermaker sra. Amalin Flanegin y asisti pa sra. Jenny Croes, pa cual Gobierno di Aruba ta sumamente agradesido. Prome cu fin di aña por mira movecionnan cuminsa tuma luga. Tur esaki ta inclui caba den e presupuesto cu Parlamento a aproba.
INTEGRITEITSKAMER:
E di dos pilar ta Integriteitskamer cu lo ta un comision cu lo cuminsa scrutina e decisionnan grandi di Gobierno, especialmente pa loke ta destahonan publico. Esaki por wordo compara cu e-Procurement cu ta un forma digitalisa pa controla cu e destahonan aki ta bay di un forma transparente y integro.
Lamentablemente pa motibonan financiero no por a institui e Integriteitskamer e aña aki manera tawata stipula. Mester a scoge entre Integriteiteskamer y Begrotingskamer na momento di traha presupuesto pa motibo cu no tawata tin fondo pa tur dos. Akinan a tuma e decision di duna prioridad na e Begrotingskamer cu ta un mocion di Parlamento. Integriteitskamer ta sigui riba plan pa 2021”, Prome Minister a informa durante e reunion den Parlamento.
Mientras tanto, Prome Minister a duna di conoce, door di Covid Begrotingskamer tampoco por a wordo realisa e aña aki. Trabounan ta siguiendo si pa traha e ley, pero na un tempo mas abou door cu mester a pone e fondo pa e crisis actual. Asina mes Gobierno ta sigui cu e trabounan di prepara e ley pa otro aña pa asina por finalisa e proceso aki.
