Desde comienso di e pandemia di COVID19, Ministerio di Husticia, Seguridad y Integracion, conhuntamente cu e partners strategico a bin ta haci esfuerso continuo pa e programa di asistencia Regreso Boluntario.
Durante di e ultimo lunanan a logra vuelonan di repatriacion asisti pa diferente parti di mundo, manera Europa via Hulanda, Republica Dominicana, Colombia, Ecuador, Peru, Argentina, Surinam y Guyana. Den luna di september a logra realisa dos vuelo pa Venezuela.
E meta di e programa di regreso Boluntario ta pa brinda asistencia na e stranheronan sea cu nan ta inmigrantenan cu un status legal of cu tin un status irregular y cu ta desea di regresa nan pais di origen di forma boluntario pa nan residencia nan mes. Esaki ta conta tambe pa e turistanan cu a yega Aruba prome cu e pandemia y a haya nan mes ta keda obligatoriamente Aruba pa via cu e fronteranan a cera.
Actualmente tin mas di 600 persona registra cu ta desea di regresa Venezuela y e lista ta sigui crece. Nos ta pidi tur interesado pa tene pasenshi y ta pendiente di nan telefon y emailadres. Percura pa e datonan ta skirbi di forma corecto den e formulario pa asina DIMAS por tuma contacto.
Asistencia
E asistencia cu pais Aruba ta brinda ta entre otro di duna informacion, haci registracion y inventarisacion di cuanto persona tin interes den e programa y pa cua parti di mundo, mediacion riba nivel diplomatico cu e pais di origen y e asistencia logistico cu ta encera entre otro regel e aerolinea (cuanto vuelo, cuanto persona pa vuelo). Regreso Boluntario ta un programa di asistencia special pa esnan cu ta na Aruba y kier regresa nan pais di origen.
Nos ta pone un enfasis riba e parti humanitario mirando cu te ainda e fronteranan cu e paisnan ta cera y pa es motibo ey e persona no por book un vuelo comercial. Riba nivel diplomatico pais Aruba ta haci e mediacion pa asina e pais por ricibi su residentenan bek via di e vuelonan di Regreso Boluntario
