Vishon a tuma nota di e karta di gabinete Rhuggenath ku a bai pa presidente di Staten kaminda ta informá parlamento tokante e resultadonan lográ durante e negosashonnan pa loke ta trata e ‘Landenpakket’ i e CHE. Sumando varios punto a menshoná diferente ‘resultado’ lográ pa kual awor si por bai di akuerdo ku e proposishon di Hulanda.
Na promé lugá gabinete ta menshoná ku no por tòrnu na e outoridatnan legislativo i gubernamental di staten (punto I). Esei ta nifiká ku eventual kambionan den legislashon i regulashon tambe lo mester di aprobashon di Staten despues ku introdusí e ‘Rijkswet’. Esaki ta konta tambe pa eventual kambionan presupuestario pa motibu di e reformanan. Pues e entidat lo yuda solamente ku formulashon di e agènda di ehekushon, mònitòr kumplimentu di e akuerdonan i sostené e ehekushon. Pues e reforma ta den man di Kòrsou mes.
E karta ta menshoná tambe ku e negosashonnan a produsí, ku den tomo di desishonnan tokante di ‘Rijkswet’ lo apliká e ròl di Staten i Raad van Staten di Reino manera ta poné den ‘Statüt’. Sinembargo, mientras ku kambio den Statüt no sosodé, tomo di desishon rondo di Rijskwet tambe lo no kambia. Tampoko a insinuá den e ‘landenpakket’ proponé, ku lo desviá for di esaki. Loke presísamente t’e resultado lográ den e punto akí no ta muchu kla pa pa VISHON.
Ademas gabinete Rhuggenaath a trese dilanti ku a yega na un akuerdo, ku e direktiva di e entidat lo ta sufisientemente representativo pa Kòrsou i ku e lo tin afinidat ku nos isla. (punto III). Den e kuadro akí Hulanda por nombra por lo menos un di su miembronan den konsulta ku Kòrsou. Pa loke ta trata e formashon di e entidat, sekretario di estado sr. Knops, a indiká den un kontesta riba preguntanan di Tweede Kamer datá 10 di yüli 2020, ku e ta dispuesto pa pone den ‘Rijkswet’ ku lo konsultá ku e paisnan tokante di e eksigensianan ku e miembronan nombrá lo tin ku kumpli kuné. Ku e konosementu akí, gabinete Rhuggenaath lo no a negoshá e punto akí.
E karta ta kontinuá indikando ku CHE lo no tuma e outoridatnan legislativo i gubernamental for di Gobièrnu i Staten (punto IV). Asina e derecho presupuestario lo keda den man di Staten. E lesadó atento por a nota ku den e karta di gabinete Rhuggenaath ya kaba a hasi menshon di e punto akí komo resultado di e negosashonnan bou di puntonan I i II. Vishon ta puntra su mes si Hulanda di bèrdat tabatin e intenshon di tòrnu n’e derecho presupuestario di nos Staten. Segun VISHON e intenshon di Hulanda tabata netamente pa fòrsa Kòrsou hasi reformanan duradero den nos presupuesto nashonal. Kòrsou a risibí kaba un kapital adishonal di Hulanda riba su presupuesto, por ehèmpel p’e maneho di AFMO (180 mion) i USONA (275 mion). Hulanda ta konsiente ku basá riba evaluashonnan ku Kòrsou mes a hasi, apenas e plakanan akí a yuda pa yega na reformanan duradero. O sea, e resultadonan di negosashonnan ta zona mas manera un karta for di propio bará.
E evaluashon i terminashon di e Rijkswet (punto V) por ser menshoná solamente durante di e evaluashon interminente despues di 3 aña komo un resultado di negosashon. Den artíkulo 44 di konsepto di lei ya kaba ta inkorporá ku e Rijkswet lo vense 6 aña despues ku e drenta na vigor.
Pa loke ta trata e partisipashon di personanan hurídiko (punto VI) tambe gabinete ta mir’é komo un resultado. Gobièrnu ke konvensé e lesadó ku sin e negosashonnan hasí, aparentemente lo tabata posibel pa e CHE por partisipá den kapítal di akshon di un persona hurídiko sin outorisashon di akshonista. Aki tambe e Rijkswet (§ 3.4.2, alinia 3) ta papia palabra kla. Ta menshoná den e parti akí ku hustamente ta tene kuenta ku e karakter temporal di e CHE i ku e partisipashonnan di e entidat lo kai bou di departamentunan di Kòrsou despues di su vensementu.
Pa klousurá gabinete Rhuggenaath a logra konvensé Hulanda ku Kòrsou no tin mester solamente di reformá i ekonomisashonnan, pero tambe di refuersonan duradero pa e kapital di kresementu i ganashi di Kòrsou (punto VII). Aki ta referí na e ‘Landenpakket, e ‘Programa di Transishon i Rekuperashon i e previo Strategia i Akuerdo di Kresementu’. Akaso e programa i proyektonan akí no a kondusí for di un komienso na atkisishon di sosten finansiero i di likides for di Hulanda? Òf nos mester konkluí for di e punto akí ku e resultado ta konsistí di e echo ku e CHE posiblemente lo djis bai yama OHO?
VISHON ta pone dilanti ku e ta sinseramente kontentu ku gabinete Rhuggenaath a logra un resultado durante di e negosashonnan ku Hulanda i ta spera ku gobièrnu awor porfin por kuminsá ku e reformanan nesesario. Loke si VISHON ta konsiderá menos positivo ta ku a tuma gobièrnu sigur 3 luna pa yega na un komprodementu. Ku eksepshon di algun ‘aklarashon i presishon’ VISHON no por saka afó for di e karta di gobièrnu kiko ta e kambionan konkreto ku a negoshá, tampoko dikon a dura asina tantu. Si esaki ta e resultado di diskushonnan di hopi luna, nos ta puntra nos mes seriamente si e partidonan PAR i MAN den koalishon ta realisá e embergadura di e krísis ku Kòrsou ta pasando aden. En todo kaso por bisa si ku liderasgo, vishon, desishon i ‘sentido di urgensia’ ta laga hopi di deseá.
