E dianan tras di lomba sinku mucha entre ocho i diesdos aña di edat a tèst positivo riba vírùs di corona na Boneiro. E muchanan aki no tin òf tin kehonan hopi leve i ta bayendo bon. Nan ta den isolashon na kas. E departamentu di Salubridat Públiko a hasi un investigashon di fuente i kontakto ekstensivo. Den tur kaso e muchanan a keda infektá den situashon di kas.
Tres di e sinku muchanan no tabata na skol miéntras nan tabata kontagioso paso ya kaba nan tabata den karentena, en konekshon ku un kontagio anterior den seno familiar. E otro dos muchanan ta bai skol basiko Kristu Bin Wardador i Skol Amplio Papa Cornes. Departamento di Salubridat Públiko a hasi un investigashon amplio di kontakto pa wak si alumno i dosente a kore riesgo. For di e investigashon aki a bin sali na kla ku na tur tin dies mucha ku tabatin kontakto intensivo ku e muchanan ku a pega ku e vírùs. Di e dies muchanan akí seis ta bai Kristu Bon Wardador i kuater ta bai Skol Amplio Papa Cornes. E chèns ku nan ta infektá ta chikitu, pero pa seguridat nan ta bai den karentena tòg i nan no ta bai skol den e periodo akí. Di e manera akí ta prevení ku eventual infekshon por tuma lugá na skol.
Pa e departamentu di Salubridat Públiko ta komprondibel ku mayornan ta preokupá, pero e chèns di infekshon ta mínimo. E otro alumno i dosentenan por bai skol normal, danki na e medidanan ku a tuma. Por supuesto e medidanan eksistente na skol ta keda importante: bon ventilashon, limpiesa profundo di e edifisio i laba man regularmente.
Ku gerente di skol, e Departamentu di Salubridat Públiko tin bon kontakto. Nan ta traha huntu segun e Protokòl COVID-19 skol i akohida pa mucha di kua awe ta manda un vershon nobo, aktualisá, pa e skolnan. Tambe skol a informá e mayornan.
Departamentu di Salubridat Públiko ta enfatisá un biaha mas: Keda kas si bo tin keho i yama 0800 0800.
