E intenshon ta pa enbolbí partikularmente gruponan di enfoke manera penshonadonan pero tambe otro grupo ku kurason pa agrikultura. Meta di e proyekto aki ta pa konsientisá nos hendenan ku nos por planta i generá un entrada for di e sektor di agrikultura, konsekuentemente tambe pa pone énfasis riba interkambio komersial entre e diferente gruponan di enfoke.
E proyekto ta un kolaborashon entre Gobièrnu di Boneiru, Fundashon Tienda pa Konsumidó Boneriano i tambe e departamento di LVV (Landbouw, Veeteelt en Visserij) ku ta un di e partnernan importante den e proyekto aki konsiderando ku nan ta enkargá ku maneho di agrikultura aki na Boneiru. Último tempu por a nota hopi desaroyo positivo na LVV. Por menshoná trabounan manera kosecha di maishi chikí, plantamentu i bendementu di bèrdura lokal manera yambo, bonchi di Kunuku i kònkòmber chikí i tambe prosesamentu di hoi (yerba pa bestia) i mas.
Gobièrnu kièr duna un èkstra empuhe na e desaroyo positivo ku ta tumando lugá i den kuadro di esaki ta bai sigui stimulá e sektor aki pa medio di insentivonan na empresarionan den sektor di agrikultura. Pa medio di e proyekto “Di Simia pa Produkto” gobièrnu ta bai ofresé guia intensivo, konosementu, fasilidat pa awa di irigashon i tambe posibilidat di tereno na LVV pa desaroyá bo mes plantashi pa un temporada definí. Fundashon Tienda pa Konsumidó Boneriano ta responsabel pa konsientisá nos agrikultornan pa produsí produkto lokal pero tambe pa trese un kambio den nos forsa di kompra pa asina konsumí mas tantu produkto lokal posibel.
Den transkurso di e simannan benidero gobièrnu lo sigui informá tokante e proyekto “Di Simia pa Produkto”. Pa mas informashon por chèk e página di facebook Di Simia pa Produkto
