No ta bai ehekutá e moshon di siman pasá, den e moshon ei a hasi un yamada pa hasi un adaptashon den ordenansa di emergensia i eksonerá mayornan di e obligashon pa manda nan yu skol. Den un karta gezaghèber Edison Rijna ta pone Konseho Insular na altura di esaki. Rijna ta skirbi ku eksonerashon di enseñansa obligatorio no ta algu ku por regla pa medio di un ordenansa di emergensia. Esaki pasobra den kaso di un ordenansa di emergensia ta trata di un obligashon òf prohibishon ku ta keda imponé. Den un ordenansa di emergensia no ta bai tokante pèrmití aktuashonnan ku nòrmalmente mirá ta kastigabel. I esaki ta netamente loke ta meta di e moshon, esta ku ta eksonerá mayornan di algu ku nòrmalmente mirá ta kastigabel.
Tin un otro motibu tambe pakiko no por ehekutá e moshon. E moshon ta en pugna ku e derecho ku muchanan tin pa haña enseñansa. Sigun e moshon, pa motibu di e situashon rònt di COVID-19, mayornan mester haña oportunidat pa no laga nan yu bai skol. Esaki pasobra mayornan ta preokupá pa nan salú. Pero si mayornan tene nan yu na kas pa e motibu ei, derecho riba enseñansa ta na peliger.
Gezaghèber ta skirbi ku el a wak kiko tin mas peso. Derecho riba enseñansa òf preokupashon tokante salú di nos muchanan na skol. Den su karta Rijna ta enfatisá ku den kaso di tene skolnan habrí, debidamente a tene kuenta ku bienestar di nos muchanan. E chèns ku nos muchanan ta kontagiá otro na skol òf ta keda kontagiá einan ta chikitu, asina Rijna ta skirbi. Asta den kaso ku un mucha keda kontagiá, mayoria biaha esaki ta sosodé den sírkulo doméstiko i nan tin tiki keho. Na mes momentu ta bon pa un mucha pa e ta den un ambiente sosial den un situashon eskolar, tantu pa su bienestar komo pa su desaroyo.
Gezaghèber tin komprenshon pa mayornan ku ta preokupá tokante salú di nan yunan i e personanan ku ta biba huntu ku nan den kas. E ta kere ku solushon pa esei no ta keda den medionan hurídiko. E ta proponé pa mayornan i skolnan bai den kòmbersashon ku otro i konhuntamente yega na un solushon. Entidat Públiko Boneiru i e skolnan ya ta hasiendo esei kaba durante algun tempu. Si un mucha no por bai skol pa motibu di salú, e ora ei ta posibel pa wak pa kada alumno kon ta solushoná esaki. No ta tur alumno tin e mesun nesesidat.
