A brinda informacion di bono di gobierno, cuentanan anual, cambio presupuesto 2020 y presupuesto 2021
Minister Maduro tabata den un Encuentro Publico na Parlamento pa informa riba e cifranan di e segundo kwartaal di aña 2020. E mandatario a probecha e ocasion pa asina brinda informacion tambe riba e emision di bono di Gobierno, cuentanan anual, cambio di presupuesto 2020 y presupuesto 2021.
Rapport positivo di CAFT
Minister Maduro a informa Parlamento aña a habri bon y a ricibi entrada mas halto cu premira, pero den segundo kwartaal e efecto di COVID19 a wordo sinti. Entrada a keda atras y a bin mas gasto, aunke cu Gobierno a purba pa wanta pa no haci tur gasto cu tabata presupuesta. E mandatario a splica cu e cifranan a wordo controla tambe pa CAFT y nan tabata positivo den nan rapport riba e ehecucion di Presupuesto 2020.
Emision di bono di Gobierno
Minister Maduro a splica Parlamento riba e necesidad pa emiti bono di Gobierno y a mustra e lista di tur debe cu Pais Aruba tin desde 2009 cu ta inclui den Presupuesto di Pais Aruba. A probecha pa por a splica na placa chikito con emision di bono ta tuma lugar pa asina aclarea tur e malcomprondimento cu ta reina debi na speculacion innecesario.
Cuentanan anual
E mandatario a indica na Parlamento cu pronto por spera e Ley pa asina por stipula e saldo di cuentanan anual di Pais Aruba pa añanan 2016, 2017 y 2018. E retraso ta debi cu Parlamento kier a wak cambio haci den e ‘decharge’ di e ministernan pa asina pone explicitamente cu e aprobacion di e saldo no ta implica cu e minister ta keda libra di tur responsabilidad.
Cambio di presupuesto
Manera palabra cu Parlamento, Gobierno lo presenta un segundo cambio di Presupuesto 2020 pa asina ahusta e presupuesto mas serca na e realidad cu COVID19 ta trece pa nos Pais. E cambionan a yega Parlamento caba pa su tratamento y Minister Maduro a facilita Parlamento cu un grafico den cual por mira tur cambio importante. Entre otro, e suma di e deficit ta bira mas chikito debi na e calculacionnan nobo di scenario economico cu ta keda ahusta den e cambionan proponi. Na momento di trata e segundo cambio di Presupuesto 2020, Minister Maduro lo brinda informacion mas detaya.
Presupuesto 2021
Minister Maduro a splica Parlamento cu debi na e situacion di crisis, e preparacion di Presupuesto 2021 a cay atras. E mandatario a pasa den e ‘timeline’ di e trabounan necesario y a indica cu pa fin di november Parlamento por ricibi e concepto ley pa su tratamento y aprobacion.
