Entidat Públiko Boneiru den konsulta ku lidernan di grupo di karnaval a disidí pa kanselá e paradanan di karnaval pa 2021. Tambe tur otro evento ku ta mará na esaki, manera festival di tumba i elekshon di Reina i Prens di karnaval i tambe Pancho, a keda kanselá.
Durante un reunion kaminda diputado sra Nina den Heyer, hefe suplente di SKAL Felix Thomas i lidernan di diferente grupo di karnaval a hasi akto di presensia, e presentenan a yega na e konklushon aki. Den konsulta ku e lidernan di grupo di karnaval nan a yega na e konklushon pa kanselá e paradanan di karnaval pa aña 2021. E partido ku no tabata presente tabata e organisadó di Karnaval mes. Esaki tabatin di haber ku e echo ku ainda niun partido no a hasi petishon pa organisá e evento.
Na kuminsamentu di e anochi diputado Nina den Heyer a splika ku e periodo di karnaval, mirando e sirkunstansianan aktual, no por tuma lugá den e periodo regular di yanüari te ku mart. E lidernan di grupo di karnaval a mustra komprenshon pa esaki i a añadí ku e situashon finansiero di e partisipantenan tambe ta un opstákulo.
Konhuntamente nan a yega na e konklushon ku eventualmente un otro temporada di aña tampoko lo no ta posibel, pasobra lo surgi skarsedat di tempu pa loke ta trata e preparashonnan pa karnaval 2022 i disponibilidat di spònsernan lo ta limitá.
Mas lat durante e anochi e lidernan di grupo di karnaval a hasi uso di e oportunidat tambe pa evaluá organisashon di e evento kultural aki. Nan a ekspresá e nesesidat pa uni i traha huntu.
Entre tantu Kolegio Ehekutivo a formalisá e desishon pa no laga karnaval 2021 tuma lugá. A pesar ku otro aña no tin karnaval, e partidonan a palabrá ku otro pa no sinta ketu, pero pa usa e posibilidat ku a surgi pa fortifiká organisashon di selebrashon di karnaval pa den futuro.
