ORANJESTAD,Aruba
Na unda nos ta biba y con nos ta biba? Ta importante pa haya un bista di e caracteristicanan di e viviendanan den cual hogarnan na Aruba ta biba. Por ehempel e cantidad di camber, e cantidad di baño y si e vivienda tin acceso na facilidadnan basico.
E cantidad di camber den un vivienda dividi door di e cantidad di persona cu ta biba den e vivienda ta indica por ehempel si e espacio cu e hogar ta biba aden ta adecua of limita. E calculacion aki ta parti di e asina yama “Better Life Index” of “Indice pa un Bida Miho”
Pa entre otro por calcula e “Indice pa un Bida Miho” e cuestionario di e Censo ta inclui pregunta di e sorto di vivienda den cual hogarnan ta biba, por ehempel si e ta un cas, un apartamento of un otro sorto di vivienda. Tambe ta puntra si e vivienda ta e propiedad di e hogar of e ta na huur y cuanto tempo e hogar tin ta biba den e vivienda.
Otro preguntanan inclui den e cuestionario di e Censo ta e superficie total di e vivienda, si tin un cushina of un otro lugar pa cushina, si tin conexion di awa, coriente, telefoon y cable, y si e conexionnan aki ta habri.
Pa por tuma mihor decisionan basa riba datonan actual e informacion di bo vivienda ta importante.
Pasobra Aruba ta conta riba BO!
