ORANJESTAD,Aruba
Gobierno a indica cu Hulanda lo a cambia e condicionnan pa cu e di tres tranche di sosten di likides, specificamente e termino pa cual e di tres tranche di 204 miyon florin ta wordo otorga. Segun Prome Minister esaki a causa un deficit adicional cu lo wordo cubri pa un prestamo riba mercado di capital. “E confusion cu a surgi despues – esta si e fiansa ta bay wordo hasi riba mercado internacional of local – a contribui un biaha mas na e incertidumbre cu ta bida serca esanan cu ta depende di e asistencia di Hulanda,” asina Parlamentario pa e fraccion berde, mr. drs. Richard Arends, a declara. “Pa haña claridad den e asunto nos a dirigi algun pregunta al respecto na e minister encarga cu finansa publico y economia.”
Mirando cu no ta yegando na un acuerdo cu Hulanda, e parlamentario a puntra di ki suma ta papiando ora ta referi na un deficit adicional y si e suma aki lo wordo fia den su totalidad. “Tin diferente instrumento di financiamento, manera bononan publico, prestamonan priva of prestamonan di termino cortico,” Parlamentario Arends a splika. “Ta existi un percepcion cu fiansanan pa gastonan coriente di Hulanda lo ta na 0%, cual no ta e caso segun e ultimo version di e documentonan di negociacion. P’esey ta importante pa sa ki tipo di instrumento a wordo usa, como tambe na cua percentahe.”
“Banco Central ta nos banco di estado y mas cu logico cu ta e instancia encarga pa emiti bononan den caso cu Gobierno hasi un fiansa publico. E parlamentario a hasi pregunta riba e rol di Banco Central den esaki y si a hasi un sondeo preliminar di e mercado. Resultado di e sondeo aki mester traduci su mes den inscripcionan real pa asina por garantisa cu ta sera e suma cu kier fia,” e la splika. Fraccion di AVP kier sa ki dia e proceso di inscripcion publico aki lo cuminsa y kico ta e destino di e fondonan cu lo wordo genera.
Den su preguntanan Arends a para keto un rato riba e ultimo fiansa internacional cu Aruba a hasi ultimamente. Na april ultimo Conseho di Minister di Reino a duna su consentimiento pa Aruba fia $325 miyon riba mercado internacional; te cu juni a fia solamente $253 miyon. Fraccion di AVP a puntra kico a sosode cu e diferencia ekivalente na 130 miyon florin y si esaki a wordo usa pa paga debenan cu ta caduca, of pa cubri e deficit of pa alivia e retonan di likides.
Por a tuma nota cu Secretario di Estado Knops tabata basta irita na salida di Conseho di Minister di Reino diabierna ultimo. Primeramente pasobra a crea un impresion cu Aruba lo fia riba mercado internacional cu tin mester di aprobacion di Reino segun Statuut y despues a resulta di no ta e caso. “Hecho cu Aruba mes a cubri su necesidad di likides mientras tabata na mesa cu Hulanda no a cay den bon tera na Hulanda,” Arends a declara. “E pregunta cardinal den esaki ta con lo e influencia e “negociacionan” di awor en adelante.”
Na luna di maart Parlamento a aproba un deficit di 1.6 biyon di florin y recientemente Parlamento a ricibi e presupuesto supletorio pa aña 2020 cu un deficit di 1.1 biyon. Fraccion di AVP ta spera di haña contesta tambe ki parti di e deficit aki ta cubri caba cu y sin e sosten di likides di Hulanda.
