ORANJESTAD,Aruba
Un di e proyectonan grandi di Sociaal Crisis Plan ta e Family Justice Center cu ta basa ariba e metodonan internacional centralisa pa atende cu casonan di delito contra menor.
E concepto cu ta preparando pa wordo ehecuta na Aruba ta basa ariba e punto di salida pa trece tur servicio, relaciona cu delito contra menor, bou di un solo dak, caminda e victima por haya ayudo un solo caminda y no mester conta su storia diferente biaha na autoridad. A orienta y bishita ariba diferente ‘best practises’ na Europa y Merca, manera Family Justice Center, Child Advocacy Center, FIER Friesland y Barnahus. Tur tin un aspecto comun: nan ta pone servicio medico, forensico, hudicial y social bou di un dak. Esaki ta netamente locual cu ta preparando pe cu e Family Justice Center pa Aruba.
Representantenan di European Family Justice Center Alliance y FIER Friesland a bishita Aruba den comienso di aña y actualmente ta trahando hunto cu Sociaal Crisis Plan pa desaroya e concepto aki pa por wordo implementa na Aruba. Durante nan bishita den luna di februari 2020 a duna un presentacion amplio na henter sector social y tambe na Ministernan concerni y Parlamento di Aruba.
E proceso di implementacion di e concepto Family Justice Center ta parti den dos fase. Den e prome fase lo enfoca ariba e ayudo na menornan di edad cu a bira victima di abuso sexual y abuso fisico. E meta ta pa mehora e proceso di investigacion medico, forensico, hudicial y tambe e ayudo social/mental necesario. Lo cuminsa pronto cu e negociacionnan cu tur instancia pa trece e servicionan mas hopi posibel den un solo edificio.
Den e di dos fase lo enfoca tambe ariba victimanan adulto, entre otro aspectonan di violencia domestico. Tambe lo enfoca ariba casonan complica di abuso emocional y negligencia di mucha. Den tur dos fase lo por conta ariba sosten di European Family Justice Center Alliance y FIER Friesland.
E exito di e proyecto importante aki lo depende di e colaboracion y aporte di cada instancia y consequentemente tur Ministerionan relevante. E centro nobo aki no ta un organisacion nobo, pero e lo ta un establecimiento nobo na unda tur instancia ta bin hunto pa duna un servicio central na e cliente.
Pa mas informacion tocante proyectonan di Sociaal Crisis Plan por tuma contacto cu 528-1100 \ 528-1189 of por manda nos un mensahe riba nos Facebook page @scparuba. Pa documentonan di Sociaal Crisis Plan, por manda nos un email na info@scparuba.com.
