ORANJESTAD,Aruba
Awe aña parlamentario 2020-2021 a habri y manera custumber y manera constitucion ta prescribi. Riba dia di apertura di Aña Parlamentario Gobernador ta bin expone e liña di maneho pa e period 2020-2021 den nomber di gobierno. Locual a hala atencion di Parlamentario Richard Arends, como su prome reaccion riba e discurso di apertura, ta cu Su Excelencia Gobernador di Aruba a indicia enfaticamente cu e relacion entre Aruba cu Hulanda lo cambia den e Aña Parlamentario nobo aki.
Richard Arends ta remarca cu esaki ta algo cu siguramente den lus di tur e discucionnan cu tin den e ultimo lunanan riba un introduccion di un entidad of organo pa introduci reformanan, ta algo cu sigur a hala hopi atencion. Pa loke ta traha maneho concreto, Gobierno Tabata hopi limita dunando indicacion cu maneho di gobierno ta keda dicta door di entidad hulandes aki.
Aunke cu Gobernador ta hiba e discurso den number di Gobierno, e la subraya presencia di division y falta di union pa afronta e retonan nos dilanti. Segun Arends, e la tuma nota cu enbes di duna un bista di loke ta bay ta e maneho e aña nos dilanti, Su Excelencia Gobernador a para keto na locual hustamente ta keda falta.
Maske cu den e discurso di apertura a identifica e retonan nos dilanti manera e realidad laboral nobo, e zona di peliger cu comercio ta aden ainda y e falta di dialogo genuino, Gobierno no a sa di duna e contenido na esakinan. Gobierno no a presenta ningun maneho pa atende cu e perdida di cuponan di trabou cu ta nos dialnti, ni tampoco un maneho economico pa termino cortico pa locual ta trata empresanan mediano y chikito.
Esakinan ta puntonan cu Arends como parlamentario ta haya falta di nan den e discurso y sigur a remarca esaki den e ultimo simannan, pero tambe ta puntonan cu comercio y otro miembronan di sector priva ta bezig ta vocifera y a haña bon di tende cu Gobernador a trece esakinan dilanti tambe.
