ORANJESTAD,Aruba
Desde inicio di e pandemia aki Dr. Horacio E. Oduber Hospital a introduci diferente regla pa asina minimalisa chens di contagio di covid-19 y protehe tur pashent, bishitante y alabes miembronan di personal. Un di nan ta reglamento pa bishitante di pashent cu ta contagia cu covid-19 y tambe pashent cu ta admiti pa otro tratamento medico. Tambe kier recorda cu mask ta obligatorio pa tur persona cu ta drenta Hospital.
Hospital sigur no ta lubida e importancia di e parti emocional y humano, pero aworaki ta momento pa focus riba e salud y siguridad di nos pashentnan y sigur di nos personal y p’esey ta pidi tur hende pa respeta nos reglanan. Corda bon cu si nos dunadonan di cuido no ta saludabel nan no por cuida e pashentnan interna.
Regla pa bishitante di pashent cu Covid-19
Si un pashent interna tin Covid-19 e no ta permiti pa ricibi bishita. Esaki ta pa asina minimalisa riesgo di contagio entre famianan y alabes pa protehe nos personal. Cuido di pashentnan cu Covid-19 ta intenso y nos no kier yega na un momento cu tin scarcedad di personal pa motibo cu nan salud ta malo y pues ta deber di nos tur pa cuida nos frontliners.
Regla pa bishitante di pashent cu Covid-19 den fase terminal
Tin excepcion pa pashent cu Covid-19 cu ta terminal cual por ricibi bishita di solamente casa y yiu(nan). Semper hasiendo uzo di proteccion corecto pa minimalisa riesgo di contagio. Hospital ta mira e importancia di e parti emocional y humano y pues aki a haci un excepcion. Na otro partinan di mundo mayoria di biaha no ta ni permiti bishita na momento cu un pashent ta terminal.
Regla pa bishitante di pashent admiti
Ta permiti solamente 1 (un) bishitante mayor di edad (18 aña of mas) pa pashent interna. Tene bon na cuenta cu lo nenga entrada si e bishitante no tin mask bisti. E orario di bishita lo sosode na un orario fiho cu un duracion di 1 ora. E orario fiho aki lo ser comunica directamente cu e pashent/ bishitante pa asina por keda garantisa distanciamento social den cada camber.
Porfabor mantene un bon higiena di man haciendo uzo di nos hand sanitizers situa na diferente lugarnan strategico prome y despues di haci bo bishita of atende bo cita. Directiva, staf y personal di Hospital ta gradici tur hende pa nan comprension y cooperacion. Hunto nos por combati’e!
