ORANJESTAD, Aruba
Parlamentario Endy Croes ta splika cu mas e dia ta asercando pa tuma un desicion mas nos ta decifra e “boze plannen” di e Militair Knops y Hulanda. Berdaderamente mundo henter a wordo sacudi pa e Covid 19 y Aruba como un isla cual su entrada principal ta depende di turismo e golpi tabata mucho mas fuerte. Den rapport di Standard & Poors di final di maart 2020 por ehempel Aruba a sali number 1 den 122 isla/pais cu a wordo afecta ferozmente economicamente como cu turismo a bay plat. Esaki ta pa ilustra e magnitud di e impacto economico pa Aruba.
/// Hulanda kier brinda ayudo y Aruba tin mester di un ayudo:
Den henter e proceso aki desde cu corona crisis a jega Aruba gobierno mester a tuma desicionnan pa sera frontera den combinacion cu hopi otro medida pa scapa e bida di hende esta dunando salud di pueblo prioridad. Henter mundo a tuma medidanan comun pa scapa nan pueblo. Consecuentemente 37.000 hende na Aruba a keda sin trabou durante e periode ey. Hulanda mesora di acuerdo cu Statuut a brinda Aruba ayudo prestando Aruba plaka na 0% interest na lunanan di April, Mei y Juni. Un total di 156.1 miyon florin Hulanda a presta Aruba te cu awor. Pa e di tercer tranche cual ta 204 miyon florin cual mester tabata pa lunanan di Juli-Aug-September pero pa esaki Militair Knops a bin cu condicionnan extra mucho pisa. Entre otro pa Aruba bay di acuerdo cu (2) Rijkswet. Si no ta pa e malmaneho di Mike Eman y AVP kendenan a redobla e debe nacional di 43% pa 93% di 2009-2017 Aruba awe no mester ta mendiga na Hulanda. Pior ainda Hulanda ta abusando di su poder financiero mei mei den un crisis pa re-colonalisa e islanan a cambio pa presta nan plaka.
/// Militair Knops su plan macabro ta particularmente cobra belasting:
Den documentonan ( Landspakketten) cu Hulanda tin riba mesa pa ehecuta dado caso acepta Rijkswetten y Entiteit tin un parti interesante. Militair Knops y Hulanda a splika cu belastingkantoor no ta funcionando debidamente y di acuerdo cu nan informacion tin masha hopi miyones di plaka di belasting riba caya. Parlamentario Endy Croes ta splika cu e ta 100% sigur cu Militair Knops y Hulanda no a tene cuenta cu amtshalve belasting cual ta pone e suma aki mustra grandi pero ta trata di un suma cu no ta real. Momento e personanan entrega nan bezwaar e sumanan aki lo baha considerablemente. Militair Knops den su contestanan recien di 27 di Augustus na Tweede Kamer na pregunta # 15 di Fraccion di VVD, a contesta lo siguiente: “ De huidige inning van belastingen is blijvend punt van aandacht. Onderdeel van de voorwaarden horende bij ondersteuning vanuit Nederland is dat de inzet van de landen om de belasting compliance te verhogen wordt geintensiveerd als onderdeel van een integrale aanpak.” Alaves a splika cu lo bin cu leynan nobo pa cobra mas belasting. Na Hulanda ta conosi por ehemplo kijk en luistergeld belasting. Tambe ta conosi hondenbelasting pa nombra algun. Pues banda cu Militair Knops mei mei den un crisis a cambio pa presta Aruba plaka ta bay cu Bo autonomia, Militair Knops lo baha pisa riba comerciantenan pa cobranan mas belasting y Militair Knops lo baha pisa riba pueblo pa cobra y introduci belastingnan nobo y kisas te hasta belastingnan descabeya. Asina Militair Knops y Hulanda kier juda drecha Aruba. Nos lo monitor e desaroyo aki di serca y lo keda informa pueblo di e Plan macabro di Militair Knops y Hulanda.
