ORANJESTAD, Aruba
Ministerio di Finanansa, Asuntonan Economico y Cultura y Departamento di Cultura ta trahando riba e training “Educa cu Cultura”.
Esaki ta un training specialmente pa empleadonan publico y Organisacionnan No-Gubernamental (ONG) cu ta traha riba tereno di cultura. Nan mester tin conocemento di conceptonan y terminologia relaciona cu cultura.
Por ehempel ‘cultura’. Con ta defini cultura?
Ora ta trata di maneho di cultura, ta e definicion di UNESCO e 193 paisnan miembro di UNESCO ta aplica: “Cultura ta encera un cantidad di aspecto spiritual, material, intelectual y emocional cu ta caracterisa un sociedad of un grupo social. Incluyendo no solamente arte y literatura, sino tambe forma di biba, derechonan fundamental di e ser humano, sistemanan di balor, tradicion y creencia.” Por comprimi e definicion aki den tres palabra. Cultura ta nifica simplemente: forma di biba!
Otro conceptonan cu ta haya atencion ta maneho integral di cultura y papel di cultura den desaroyo duradero. Ora ta papia di un maneho integral di cultura ta referi na e areanan di cultura cu ta relaciona y complementa cu otro. Tambe e ta ensera cu organisacionnan y actornan cultural ta traha cu otro sectornan di comunidad y organisacionnan local y internacional. Cultura tin un papel clave den desaroyo duradero di un pais. Cultura ta instrumental pa economia, bida social, bienestar general y medio ambiente di un pais.
E prome grupo di empleadonan publico cu a ricibi e training indica tabata empleadonan di Ministerio di Cultura. Awor hunto cu Departamento Cultura Aruba (DCA) ta preparando pa sigui duna e curso na otro empleadonan di DCA y na e sector cultural di Aruba.
Actualmente Ministerio di Cultura ta preparando algun profesional riba tereno di cultura pa nan tambe por sigui duna e training aki. E meta final ta pa tur esnan activo riba tereno cultural y pueblo di Aruba ta na altura di kiko basicamente cultura ta come y bebe.
Mirando e ‘normal nobo’ cu nos ta bibando aden ta experimenta tambe cu formanan online pa duna e training menciona. Riba e portret nos por mira un encuentro cu a tuma lugar recien entre e facilitadornan y staf di DCA .
