KRALENDIJK, Bonaire
Gobièrnu di Boneiru ta felisitá Irgwin Sluis, mihó konosí komo Ir-Sais nasé na Boneiru ku su logronan optené den eksterior. Ir-Sais a sa di laga papiamentu zona internashonalmente ku hopi éksito.
Na aña 2018, Ir-Sais a lansa e kantika, “Dream girl”, e kantika aki a kai na agrado di e DJ LY PROD ku a kompartí esaki riba su instagram; esaki a yuda ku popularidat di e kansion. Tambe Ir-Sais a traha huntu ku e artista latino, Rauw Alejandro pa lansa un “remix” di e kantika i asina hasi e kansion aun mas famoso internashonalmente. Pa Ir-Sais, esaki tabata su promé eksperensia trahando ku un artista latino.
E kantika a kue otro rumbo riba TikTok na momento ku ela bira un hit i tur hende a kuminsá baila e kantika aki komo e “Challenge” nobo di TikTok. Ela ser baila mas ku 4 mion biaha entre otro bou di artistanan famoso manera Jason Derulo. E kantika “Dream Girl” a ser nombrá e mihó kantika latino di verano 2020. Aparte di esaki, tambe ela yega Platinum na Peru, i Oro na Mexico, Spaña i Brazil. E remix tambe a logra yega den top 100 riba listanan di Apple music na 41 país i tambe e tabata den top 50 di Spotify na 33 país.
Ir-Sais su interes pa ku e mundu di músika a lanta na edat di 11 aña na momento ku ela kuminsá toka “drums” trahá di barí. Asina ela sigui desaroyá su mes den tur e diferente terenonan di músika, esta skirbi kansion, produsí músika i dor di siña toka diferente instrumento.
Na nòmber di Gobièrnu di Boneiru; Diputado Elvis Tjin Asjoe, Diputado Nina den Heyer, Diputado James Kroon i Gezaghèber Edison Rijna, kièr a felisitá Ir-Sais ku su logronan i pa sigui riba e kaminda pa laga mundu kompleto sera konosí ku nos idioma Papiamentu i isla Boneiru.