ORANJESTAD, Aruba
Recientemente por a tuma nota di e interes creciente pa planta cuminda pa consumo propio. Por a ripara cu durante e dianan di SiP y TDQ, ta hopi persona a cuminsa traha den nan cura pa arma nan propio plantacion. Y aki ta unda e importancia pa educa y stimula nos hobennan pa aprecia y reconoce e importancia di e ofishi di plantacion ta di sumo importancia. Si nos kier yega na un dependencia propio di cuminda den un futuro, nos mester cuminsa inculca den nos hobennan e amor pa naturalesa y su virtudnan cu e tin pa ofrece humanidad.
Como un docente di profesion, Minister Chris Romero ta reconoce e importancia di motiva y hasta inculca e cultura di plantamento den nos generacionnan mas hoben. Como parti di su vision, e Titular di e Cartera di Sector Primario ta duna un atencion special na e desaroyo di e diferente proyectonan escolar cu ta envolve agricultura. Por a mira e participacion personal di Minister Romero den e proyecto “Hofi Amistad”, cual e mandatario a instrui Santa Rosa pa haci’e bira un realidad. Pero mester menciona tambe e coperacion estrecho entre Scol Pa Ofishi (SPO) na Santa Cruz y Santa Rosa, cu ta impulsa pa Minister Romero tambe, cu e meta pa yuda e scol yega na nan Greenhouse pa nan proyectonan di agricultura.
For di momento cu SPO a muda pa su edificio nobo den bario di Brazil, Santa Rosa tabata trahando di serca cu e Directiva di e scol pa asina crea un plan concreto y implementa un infrastructura adecua pa e alumnonan ta sigur di por sigui nan lesnan di Horticultura, Agricultura y Acuaponics. Di e manera aki a cuminsa cu e construccion di e Greenhouse pa SPO y esaki awor ta den su fase final. E greenhouse aki, cu tin un grandura ideal pa acomoda tur studiante y hasta e diferente structuranan di plantacion, lo ta un aspecto sumamente positivo pa e alumnonan den e aña escolar nobo.
Minister Romero ta boga pa e coperacion entre SPO y Santa Rosa continua di manera estrecho cu e meta pa duna un stimulo continuo na e studiantenan pa nan keda den e mundo di plantamento. “Mi vision ta pa stimula y crea interes den nos hobennan den e area di agricultura, y pa logra esaki nos mester crea mas proyecto cu lo sirbi como incentivo pa nan por continua nan estudio den e ramo aki”, tabata palabranan di Minister Chris Romero na momento di su bishita na SPO Brazil pa cu e proyecto di nan Greenhouse.
