ORANJESTAD, Aruba
Awe tardi ciudadanonan di Simon Antonio bou liderasgo di sra. Balentina a cana den un forma di un marcha pa bay entrega un carta na Minister Andin Bikker.
Ta asina cu pa basta tempo e ciudadanonan di Simon Antonio ta den un lucha incansabel pa por salba nan salud y naturalesa den nan bario. A papia y reuni cu varios instancia sin ningun resultado. Na final a dicidi pa lanta un caso contra Gobierno pa cu e daño cu dump ta causando pa e salud di e ciudadanonan di Simon Antonio. Sra. Balentina a hasi un petishon na e mandatario pa porfabor pone un STOP na full e operacion di dump mirando cu dia pa dia mas ciudadanonan ta birando malo y ta hañando problema cu nan salud. A wordo menciona tambe cu mirando cu esakinan no ta temponan normal cu un virus pisa cu ta andando mundial y tambe na Aruba no por laga dump continua cu nan operacion. Esaki pa motibo cu tur e humanan toxico ta causa daño na bo pulmon entre otro cu ta hasi bo riesgo di wordo contagia severamente cu COVID-19 mas halto. Sra. Balentina a puntra Minister Bikker pa tambe trese esaki na atencion di Minister Dangui Oduber encarga cu salubridad. Pa hopi tempo ta purba di contacta e mandatario cu emails y yamada pero te dia di awe no a haña niun forma di contacto cu Minister Dangui Oduber. Como respuesta Minister Bikker a contesta bisando cu e lo tuma e carta aki y lo tuma tempo pa wak e situacion di Parkietenbos y tambe duna e carta na Minister Dangui Oduber. Sra. Balentina hunto cu e ciudadanonan di Simon Antonio ta spera cu di berdad e mandatarionan tuma accion y pa esaki no mester escala. Sra. Balentina hunto cu e ciudadanonan ta den espera di un veredicto di Juez pa cu e caso cu nan a lanta. Pero si Aruba nos yuda nan lo tuma pasonan mas pisa y bay internacional cu e caso aki.
