KRALENDIJK, Bonaire
Bo tin keho leve manera un tiki kayente di kurpa, nistermentu, kuminsamentu di tosamentu òf un kishikishi desagradabel den garganta? E ora ei bo por traha sita pa un tèst na e ‘COVID drive-thru’ riba djamars 18 di ougùstùs di 4 or pa 6 or di atardi.
Otro siman Salú Públiko di Entidat Públiko Boneiru den koperashon ku Fundashon Mariadal i klínikanan di dòkter di kas ta organisá un ‘COVID drive-thru’. E manera di traha di kustumber ta ku ta hasi tèst serka e pashènt na kas, pero pa medio di organisá un COVID drive-thru dia 18 di ougùstùs Boneiru nos ke tèst mas tantu hende posibel i eksponé ménos habitante i personal médiko posibel. Na luna di aprel 2020 pa promé biaha a introdusí e COVID drive-thru na Boneiru.
Pa un sita yama 0800-0800
Entre 8 or di mainta i 10 or di anochi bo por yama e number di telefon 0800-0800 grátis pa registrá bo mes pa un tèst. Si bo keho ta hopi leve, bo ta haña un sita pa e Drive-thru. E empleado lo hasi bo algun pregunta i despues di esei e ta duna bo un sita ku un ora ku bo por pasa riba djamars. E sita ta entre 4 or i 6 or di atardi, sin sita nan no ta tèst bo. Esaki ta konta pa tantu adulto komo mucha.
Si bo kehonan ta di tal índole ku no por warda te djamars, nan ta pasa bo number di telefon pa un enfermera òf enfermero. E ora ei e enfermera òf enfermero ta yama bo bèk, e ta hasi bo algun pregunta i ta traha un sita pa bin tèst bo na kas. Bo ta haña instrukshon apart pa esei.
Ta konsehá tur hende ku tin keho ku lo por mustra den direkshon di COVID-19 pa keda kas te ora ku resultado di e tèst ta konosí.
Kon e COVID drive-thru ta traha?
Nan ta prepará un tènt grandi, kaminda por hasi e tèstnan mientras hendenan ta keda sinta den nan outo. Entrada di e drive-thru ta e lokalidat Salú Públiko, Kaya Gilberto F. Betico Croes 24 na Playa. Esaki ta e edifisio blou enfrente di stadion.
Riba e lugá pa stashoná outo banda di e edifisio tin un tènt. Ora bo kore pasa banda di e tènt, un empleado ta tuma un mònster. Esaki nan ta hasi pa medio di pasa un staf chikitu di katuna den garganta i nanishi di e pashènt. Un di dos empleado ta registrá bo informashonnan personal i otro informashonnan. Despues di esei e personanan ku a hasi tèst ta haña un foyeto tokante kon i ki dia nan lo risibí resultado di e tèst. Por tèst maksimalmente dos persona pa kada outo.
Medida
Ta importante ku tur hende ta sigui tene nan mes na e medidanan. Pues evitá sitionan ku hopi hende i mantené 1,5 meter di distansia for di otro. Paden tambe. Solamente asina nos ta protehá otro i nos ta para plamamentu di e vírùs. Solamente huntu nos ta haña COVID-19 bou di kontròl.