ORANJESTAD, Aruba
“Despues di un luna, nos ta practicamene mesun leu, cu excepcion di algun cos so cu a cambia den contenido di e paketenan di reforma, pero e fundeshi di e Rijkswet como instrumento huridico a keda mescos y ta robes” asina Parlamentario mr. drs. Richard Arends a cuminsa su discurso durante e encuentro awe cu Gobierno riba e condicionnan imponi pa Hulanda como condicion pa e siguiente fase di financiamento.
Den comunidad el a hasta bira un discusion di placa riba termino cortico versus consecuencianan riba termino largo. “Fraccion di AVP ta contra di e base huridico cu tin riba mesa, mientras cu tin otro opcionnan cu no ta torno na e orden constitucional di Reino. Gobierno di Aruba ta liber pa trece Raad van State – e organo consultativo di Reino – na altura di su preocupacionnan riba e meritonan legal di e Rijkswet pa crea e Organo di Recuperacion y Reforma” asina Parlamentario Richard Arends a bisa durante su disertacion.
Te ainda Parlamento no a ricibi e contra-proposicion pa loke ta trata e posicion di Aruba cu a entrega na luna di juli. El a sigui mustra cu mester tin mas claridad riba e asunto aki ya c’un luna pasa Minister Presidente a papia di negociacionnan cu ta hiba cu Hulanda pero Hulanda a desmenti esaki y diamars ultimo a ricibi un carta di gobierno caminda Prome Minister ta pone e palabra negocia den ‘aanhalingsteken’.
“Lo a bon pa gobierno aclaria ki tipo di dialogo a tuma luga den ultimo luna aki y tambe duna informacion riba e ‘tegenvoorstel’ cu a entrega. Fraccion di AVP na dos ocasion a pidi un copia di esaki por escrito pero no a ricibi e proposicion aki y lo ta desea di haya esaki”.
Gobierno tambe a mustra di a escala e dialogo na nivel politico y lo ta bon pa gobierno duna resultado di esaki compara cu e dialogo riba nivel ambtelijk y riba nivel di consehero y kico tabata e logronan na nivel politico, pasobra te awor e creacion di un entidad – awor organo – via Rijkswet incluyendo e paketenan di reforma (landenpakketen) y reglamentacion di supervision financiero na nivel di Reino, a keda riba mes.
Richard Arends a sigui mustra cu splicacion y discusionnan cu ta wordo hiba ta concentra riba e contenido di e paketenan di reforma, mientras cu e fundeshi legal ta completamente robes. “Ta mescos ora un hende bay remodela su cas, construi un di dos piso riba dje pero e fundeshi ta scheef. A cambia nomber di e entidad, a concentra hopi riba contenido di e Landenpakket; a cambia e aumento di edad di pensioen pa 66 aña enbes di 67 aña; algun punto segun e carta di gobierno ta ‘non negotiable’ y algun cos mas controversial, a wordo staciona te aki dos aña.
No mester hiba e discusion na un nivel di ‘si nos no acepta, nos no ta haya placa’, como cu e repercusion an legal ta mucho mas compleho.
