ORANJESTAD, Aruba
Despues di un luna, e Rijkswet como instrumento huridico pa crea e Organo di Reforma y Recupeacion, incluyendo e paketenan di reforma, a keda mescos y ta totalmente robes, asina Parlamentario mr. drs. Richard Arends a declara awe. E organo a keda cu e poder pa duna instruccion y ministernan Hulandes ta keda cu un poder pa duna instruccion na gobierno di Aruba, e asina yama aanwijzigingsbevoegdheid. E organo a keda un zelfstandig bestuursorgaan (zbo) bou ley Hulandes cu ta regla funcionamento di dicho organonan caminda cu e minister di Asuntonan Interior y di Reino tin e competencia pa fiha e maneho riba esakinan.
Ni maske nos tin representacion eyden y los di e procedura cu no a cana manera mester ta pa por yega na un consensusrijkswet, como tambe e hecho si ta mina nos autonomia si of no. Ta eleva asuntonan di Pais riba nivel di Reino uzando un base legal incorecto cu tampoco tabata intencion di e legislador pa forsa asuntonan bou capa di cooperacion. Ademas kier uza Statuut pa duna organonan Hulandes, no organonan di Reino, poder riba asuntonan di nos pais. Parlamentario Arends, a puntra specificamente kico tabata e negociacionnan: Si tabata pa cambia contenido di e paketenan di reforma of pa cambia e base legal proponi, cual ta articulo 38 inciso 2 di Statuut.
Durante e luna cu a transcuri no a manda e concepto di Rijkswet pa nos mesun Raad van Advies, mientras cu Corsou si a haci esaki. E debate den comunidad ta wordo hiba di forma unidimensional: Ta trece dilanti cu e creacion di e organo aki y incorporacion di supervision financiero den un rijkswet, ta como condicionnan pa Aruba por haya fiansa. Ora cu pone di un manera simpel y mirando e situacion financiero di pais Aruba y di sector priva, como tambe recuperacion economico, ta haci un discusion huridico mustra for di luga.
Mi ta kere cu ainda mester tin espacio pa atende e asunto aki di forma nacional c’un sosten mucho mas amplio di loke nos a mira te awor. Nos a tuma nota cu a scoge un formato pa informa gremionan di manera selectivo riba e negociacionnan, sea na momento cu mester tuma un decision, of algun dia prome cu Conseho di Ministernan di Reino. Esaki no ta yuda pa forma un frente solido pa loke ta trata e posicion di Aruba.
Fraccion di AVP ta di opinion cu e base legal di dicho entidad ta robes y creacion di un RAFT – supervision financiero na nivel di Reino – no tabata necesario. Ainda no ta conoci kico e posicion di Gobierno di Aruba ta pa cu e base legal scogi.
Parlamentario Arends a elabora riba alternativanan, pero ta di opnion cu Raad van State mester wordo informa di e obhecionnan di e islanan. Esaki tambe a base di e rijkswet cu a aproba recientemente pa Resolucion di Disputa, esta e asina yama Geschillenregeling.