ORANJESTAD, Aruba
Luna di augustus a habri pa ciudadanonan di Libanon cu un explosion devastador sigui pa un candela feros na Beirut lagando atras por lo menos 200 morto y herida rond di 5 mil hende. Aruba a sigui e noticia tragico aki cu a laga e ciudad di Beirut den tristeza grandi pa nan perdida di famianan y tambe cu hopi daño na e ciudad.
Prome Minister Evelyn Wever-Croes, den nomber di pueblo y Gobierno di Aruba a manda palabranan di condolencia y consuelo na ciudadanonan na Libanon via e Consul di Lebanon na Corsou, sr. Fayed, deseando e y su pais conformidad den e temponan dificil y forsa pa enfrenta e futuro cu sperensa y confiansa.
Apesar cu nos ta na un distancia fisico hopi grandi, pueblo di Aruba ta uni den oracion y solidaridad cu e pueblo di Lebanon y tur cu a sufri e consecuencianan di e accident teribel aki. Gobierno di Aruba ta desea un pronto recuperacion na tur cu a keda herida.