ORANJESTAD,Aruba
Diabierna ultimo den un reunion di Parlamento a trata un punto di agenda cual ta ensera pa termina e confiansa den Minister di Infrastructura y Medioambiente. Desde 5 di Juni e partido POR cu ta forma parti di Coalision a haña nan mes cu un problema interno den nan partido. Ta trata di Minister Marisol Lopez Tromp candidato riba lista di POR kende desde Nov 2017 te cu Januari 2020 tabata den funcion como Parlamentario di POR. Un di su tareanan primordial ta pa controla Ministernan entre otro su propio Minister. Na final di Januari 2020 Marisol Lopez Tromp riba peticion di su partido POR a bira Minister di Infrastructura, Medioambiente y Ruimtelijk Ordening. Sinembargo den apenas algun luna funcion por a cuminsa nota cu cos no lo ta bayendo bon internamente. Kiko tabata e problema exactamente no tabata conosi serca nos. No ta normal tampoko cu un miembro di un otro partido ta bay puntra kiko ta pasando den cas di un otro partido. Sinembargo esaki a desemboca den atakenan publico entre 2 Minister di e mesun partido POR.
/// Ultimo siman a crea un “Hype” riba corupcion:
Por a tuma nota cu ultimo siman rond di ful e problema interno di POR a crea un hype den comunidad alrespecto corupcion. Asina 24 ora.com y Tera Group di Patrick Paskel a escohe un banda den e problema interno di partido POR y a inicia un campaña contra corupcion. Parlamentario Endy Croes den su disertacion den Staten a trese dilanti cu net Patrick Paskel y Speed di 24ora.com y Teragroup te esnan cu a cobra 7 miyon florin na propaganda durante e gobernacion di Mike Eman. Nada contra pa un jui di “Tera” bay dilanti. Pero Parlamentario Croes ta garantrisa cu den e 7 Miyon aki cu Patrick Paskel a cobra via su companianan di plaka di pagadornan di belasting di Aruba tin indicasionan hopi fuerte di corupcion Ten Top! Segun Croes cu un keho oficial lo wordo entrega den e simannan nos dilanti como cu a escohe pa bay pa e mas grandinan promer.
/// Kehonan contra Mike Eman-Benny Sevinger y Bo Aruba tabata tin prioridad:
Parlamentario Croes a splika cu Corupcion ta Corupcion sea grandi of chiquito ta keda corupcion y mester wordo bringa den tur sentido di palabra. Esey MEP ta para pe! Desde cu a logra bira Parlamentario a concentra riba corupcionnan monstro di AVP cu tabata publicamente conosi. Esun di caso IBIS di Paul Croes ja tabata den proceso. Di Benny Sevinger a logra traha un file di mas di 25 miyon florin na bentanan di terenonan di Aruba unda plaka nan a lora desde Colombia, Panama, Miami, Curacao, St Maarten. Pues ta trata di un caso sumamente grandi unda a entrega keho cual ta den pleno investigacion. Den otro caso a entrega keho contra Mike Eman kende a ricibi varios transferencia bancario di Roberto Rincon. Ta papia di transferencianan di 50 mil dollar cada un. Tin mas candidato di AVP a ricibi placa di Roberto Rincon y pronto nos lo bin cu esaki. Pues ta trata di corupcionnan grandi di AVP y tenemento di man cu mafiosonan di taya.
/// Si tin un Minister President Integro ta Evelyn Wever Croes:
Como hefe di e gobierno aki Promer Minister Evelyn Wever Croes semper a duna e direcion na su gabinete cu e punto di salida Integridad. Kende cu topa cu algo “schuin” of for di sla den su caminda percura pa e investiga esaki y entrega keho mesora na Ministerio Publico. Esaki ta e mensahe constantemente di Promer Minister Evelyn Wever Croes na su gabinete. Di parti Parlamento nos a cumpli debidamente cu esaki y a entrega keho contra Benny Sevinger, Mike Eman, rapport Bo Aruba di Algemene Rekenkamer cu ta papia di 1000 miyon di projectonan di AVP. Di Ministrnan nos ta expect mesun cos. Mientrastanto nos ta bezig finalisando un keho contra Patrick Paskel y Teragroup kendenan a cobra 7 miyon florin for di Gabinete na propaganda for di Gabinete Mike Eman y tin fuerte indicasion cu un grupo selecta a “djo djo” y hopi propaganda ni a worda pasa y tabata traha facturanan falso. E reunion di diabierna a wordo geschors y pronto lo wordo jama bek pa continua den segunda buelta pa asina. Minister encuestion a schors algun hende di DIP y a manda nan cas cu pago y a kibra cierto contractnan lokual el a splika den e primera tanda. Nos ta pendiente den segunda buelta pa hanja sa cu exactitud cuanto hende, cuanto contract y cuanto keho officialmente a wordo entrega door di e minister pa bringa supuesto corupcion den su propio cartera y di ki grado di magnitud esaki ta trata.
