ORANJESTAD, Aruba
Minister Marisol Lopez Tromp ta un minister integro, ta un persona sincero y recto ta loke por wordo scucha den ultimo dianan mientras cu e actitud di Minister aki ta totalmente opuesto na loke su persona kier pretende.
E crisis cu tin den gobierno di MEP-POR-RED na e momentonan aki, a wordo crea pa e forma di actua y di procede di Marisol como miembro di gabinete Wever Croes y nada otro.
Un crisis politico cu Marisol mes a crea unda dicidi di usa esaki na su beneficion personal y politico cu awor a bira contra di dje mes y for di cual e no por saca su curpa.
Marisol Lopez Tromp a yuda funda partido POR, el a yuda formula e vision di e partido, a bay eleccion como miembro di partido POR y a ricibi su votonan personal como miembro di partido aki y el a bira representante di votadonan di POR den Parlamento.
Awor cu apenas Marisol a huramenta y oficialmente a bira Minister di Infrastructura, su vision y opinion a cambia, el a cuminsa mira tur cos diferente, a cuminsa actua manera cu e ta un Minister di su ex partido AVP, hibando oposicion politico nunca antes bisto.
Na luga di sigui cu e maneho cu su colega anterior a laga atras, Marisol a converti su mes den un enemigo politico di su propio partido, di su propio votadonan di POR, caminda el a trasforma su mes den ultimo simannan, como un Minister Independiente cu no ta liga na ningun partido politico.
Pero nos constitucion no conoce Minister sin partido, Minister sin cartera y su traicion di su di tres partido politico cu e ta forma parti di dje, a wordo dirigi contra su ex lider, su ex colega Minister den un intento pa rebiba su carera politico.
Lider suplente di partido POR, Andin Bikker y e partido a duna Marisol un ultimatum cual e no a respeta y a bay over na insulta e lider di partido y a desafia henter e partido den bista di pueblo, dor di dicidi cu e no ta baha como Minister di partido POR, apesar cu el a wordo expulsa for di e partido.
Marisol Lopez Tromp ta duna e impresion cu e ta un mandatario disgusta cu e forma con su carera politico a tambalea for di 2009 ora cu el a wordo saca for di partido MEP te cu awor, caminda el a perde mas cu 4000 voto di pueblo.
Aki tin cu mustra cu ora Marisol kier papia di integridad, e tin cu corda cu un persona integro lo respeta e decision cu su partido POR a tuma contra di su persona, caminda a pidi pa e baha como Minister representando POR den Conseho di Minister.
Marisol a opta pa no tene e honor na su mes, sigur ora cu su propio partido a kita sosten for di dje pero a bay hunga fuerte bisando cu Prome Minister no por kita su carteranan for di dje, ya cu e ta un violacion directo di e LIM.
Den conseho di Minister, varios Minister a vocifera bon cla cu nan lo no atende ningun reunion di Conseho di Minister mas si Marisol ta atende e reunionnan aki, pues otro indicacion bon cla cu Marisol no ta gosa di confiansa mas den seno di gobierno.
Esey tampoco tabata suficiente pa entrega su retiro pero Marisol manera hopi hende, ta kere cu gobierno lo no haya sosten den Parlamento pa manda Marisol cas pero tur cos ta mustra cu esaki lo tuma luga y cu lo manda Marisol cas cu retiro pa asina trankilidad por reina atrobe den gabinete Wever Croes.
Presencia di Minister Marisol Lopez Tromp mayan den e reunion aki lo no tin efecto ya cu e decision ya caba ta tuma ora cu for di diadomingo 26 di Juli ora cu dos miembro di fraccion di POR, hunto cu Ricardo Croes di RED y lider di fraccion di MEP, Rocco Tjon a firma e peticion na Presidente di Parlamento, pa yama e reunion aki, informando cu lo trata un mocion di desconfiansa contra di su persona.
Presencia di Marisol Lopez Tromp lo no cambia mucho of nada na esaki mayan den Parlamento.