ORANJESTAD, Aruba
Parlamentario Endy Croes ta precupa cu e caso “Wasmachine” di Mike Eman. Desde luna di Mei a ricibi prueba(nan) oficial di plaka cu Mike Eman a ricibi for di persona(nan) cu a y ta wordo investiga y otronan cu a haya castigo pa soborno. Ta asina cu Mike Eman atraves di Fundacion Campaña Mike Eman a ricibi 16 di September 2017 net algun dia promer cu elecion di 27 di September 2017 un transferencia bancario di Roberto Rincon. Tin diferente transacionnan a tuma lugar pero esun di 16 di september 2017 nos tin e prueba den nos poder.
/// Dicon Mike Eman no a reaciona publicamente riba e asunto aki?
Parlamentario Croes a informa pueblo mediante conferencia di prensa na mas cu un ocasion di e asunto aki . Tambe den prensa skirbi esaki a sali publica na varios ocasion. Alaves a percura pa hasi un trabou y a entrega keho oficial contra Mike Eman. No por ta asina paso Bo tabata Promer Minister e tempo aya anto Bo ta para ariba ley. Cuestionabel ta cu nos no tin prueba ainda si e transferencia aki a wordo gemeld na MOT y MOT na su turno a meld esaki na Ministerio Publico na tempo di acuerdo cu ley. Sinembargo si tin prueba cu Mike Eman a ricibi 50 mil us dollar ( 90 mil florin) riba su cuenta di banco. E plaka aki a wordo usa entreotro pa paga 13 banda cu a toka den un lighting parade como ciere di campaña di AVP. Pueblo por imagina cuanto plaka 13 bandanan musical lo cobra pa arma trailornan cu sound y toka pa un solo anochi? Plaka preto di soborno Mike Eman a usa pa cumpra voto di humilde pueblo. Pa straño cu e ta zona Mike Eman ta “muisstil” riba e asunto aki. Mike Eman normalmente ta sali reaciona den conferencianan di prensa tur momento y den cas di partido e ta grita te bira cora den su reunionnan cu gruponan chiquito. Hasta Mike a jega di falsifica tabel di Banco Central pa trata na manipula pueblo den voz halto. Pakiko Mike Eman no kier duna cara riba e aspecto aki? Paso awor si tin prueba? Porque sera?
/// Investigacion lo mester determina cuanto plaka realmente Mike a ricibi:
Ministerio Publico su mannan ta jen cu e fechorianan cu AVP a comete den 8 aña di nan gobernacion. Tanto e caso IBIS di Paul Croes, Avestruz di Benny Sevinger y awor Wasmachine di Mike Eman ta casonan du corupcion y fraude sumamente grandi. Ta spera cu Ministerio Publico por caba di hasi su investigacion pa asina por determina cuanto plaka dudoso Mike Eman a ricibi desde 2009 pa awor. Mike a tene man semper cu hopi bandido. Amigonan manera Roberto Rincon, kende na 2014 despues di elecion a ricibi den 5 dia un tereno na Balashi di Mike y Benny, hendenan manera esnan di CITGO kendenan mayoria a cay sera, Carbajal, Kiko Gomez pa nombra algun. Awe poko poko pueblo ta haña sa di unda e plaka tabata bin y por compronde e campañanan luhoso cu AVP a hiba cumprando voto cu plaka preto. Parlamentario Endy Croes ta reta Mike Eman pa sali bin papia di e topico aki den prensa. Nos ta keda pendiente pa awor pa Ministerio Publico.
