ORANJESTAD, Aruba
Den fin di siman, un grupo di boluntario di ‘Happy to Give Back’ a bishita e area turistico pa asina encontra cu nos bishitantenan pa yama nan Bon Bini bek na Aruba. Esaki nan a haci pa medio di un regalo chikito cu un storia special; un yabero cu clientenan di Funari a traha for di plastico haya riba nos playanan. Ora cu a entrega e yabero aki, e reaccion di e bishitante tabata sumamente contento. Un bishitante mericano a bisa, “Masha danki pa e bunita regalo aki. Nos ta masha contento di por ta bek, manera cu nos a haya un chens nos a bolbe…mi famia cumi tin mas cu 20 aña ta bishita Aruba. Nos no por a warda pa bolbe y sostene e comunidad Arubano.”
Kico ta Happy to Give Back
Happy to Give Back ta un iniciativa cu CEDE Aruba (Fondo Social Nacional) a lansa na luna di April. E ta un plataforma digital di donacion cu ta yuda recauda fondo pa FPNC (75%), Ban Uni Man (15%) y YMCA (10%) pa asina por sigi sostene e pueblo di Aruba cu cuminda y otro producto necesario. Te cu awor, a logra recauda $317K pero ta premira cu mester di por lo menos AWG. 850K pa luna te cu December 2020. Actualmente, tin 8.000 famia registra na FPNC – un aumento di 3000 famia den solamente un luna – cu tin mester di ayudo. Pa mas informacion, bishita: www.happytogiveback.com
