KRALENDIJK, Bonaire
Unidat di Labor di direktorado di Komunidat i Kuido den koperashon ku Plenchi di Trabou ta krea posibilidat pa sigui un kurso práktiko pa empleado logístiko. E kurso ta kuminsá entrante luna di ougùstùs i tin lugá pa 10 persona. Ainda ta posibel pa registrá pa partisipashon na e kurso.
Meta di e kurso ta pa fortifiká posishon di partisipantenan riba merkado laboral. A hasi e eskoho pa ofresé un kurso pa empleado logístiko, mirando e merkado logístiko ku ta kresiendo na Boneiru i e eskases di personal logístiko.
Den e kurso práktiko aki e partisipantenan entre otro ta siña manehá un fòrkleft/lòli, anda ku stòk den un depósito/magazein, e proseso di ‘orderpicking – preparashon di pedido’ i e proseso di transporte. E parti di formashon pa loke ta trata e proyekto aki ta na enkargo di Onderwijs Instituut Caribisch Nederland (OICN) i Bonaire Sweeping & Recycling B.V. (BS&R).
E kurso aki ta enfoká riba personanan ku:
– Kisas tin un tempu kaba ta trahando den logístika, pero no ta sertifiká ainda pa esaki.
– Personanan ku ke bai traha den logístika, pero ainda no tin e eksperensia òf konosementu nesesario.
Ta hasi e prosedura di selekshon pa partisipashon na e kurso a base di personanan ku ta inskribí na Unidat di Labor komo hende ku ta buska trabou. Na e momentunan aki ainda tin algun lugá disponibel. Si bo ta interesá pa partisipá na e kurso bo por yama òf ‘app’ +599 777 2246. Si komo doño di trabou bo ta interesá den un di e kandidatonan ku a haña e formashon aki, tambe pa medio di e number aki bo por tuma kontakto ku Unidat di Labor pa mas informashon.
Riba potrèt:
Junny Vos: Onderwijs Instituut Caribisch Nederland
Mia Tweed: Kordinadó di proyekto pa merkado laboral
Rafmildo Damascus: Bonaire Sweeping & Recycling B.V.