KRALENDIJK, Bonaire
Komo parti di ayudo ku Entidat Públiko Boneiru ta duna den kaso di debe problemátiko, konosí tambe komo e kampaña di ‘Wak Bo Sèn’, a tuma lugá un di dos ròndu di konsulta eksitoso. Durante e ròndu di konsulta ku a tene ku partnernan di kadena ku un interes den esaki a papia tokante un aserkamentu mas aleu dentro di dunamentu di ayudo den kaso di debe problemátiko na Boneiru. Tantu e aserkamentu komo prevenshon di e problemátika di debe pa medio di e partidonan presente i ku ta enbolbí, tabata sentral.
Diputado Nina den Heyer a habri e ròndu di konsulta ku un diskurso, siguí pa un diskurso tambe di direktora Silvana Serfilia-Janga. Nan a papia tokante e importansia di traha huntu dentro di kadena pa asina señalá e problemátika di debe (na tempu) i pa por prevení esaki. Den su diskurso entre otro Nina den Heyer a trese e bèrgwensa grandi dilanti ku ta reina den nos komunidat ora ta trata di debe. E la papia tokante e bèrgwensa aki pasobra mester analisá esaki pa por kibra ku e tabúnan ku ta ten’é na bida. E aserkamentu riba un isla manera Boneiru lo mester tuma lugá integralmente. Asina’ki ta krea un ambiente kaminda hendenan por anda na un manera seif i salú ku nan sèn.
E partnernan ku a bishitá e ròndu di konsulta ta entre otro diferente banko, Tienda Pa Konsumidó, Sentro pa Hubentut i Famia (SHiF), Entidat Públiko Boneiru, WEB NV, TELBO i tambe vários dùrwarder. Na luna di desèmber 2019 huntu nan a firma un deklarashon di intenshon ku ta enfoká riba enbolbimentu ku dunamentu di ayudo den kaso di debe problemátiko na Boneiru. Den e kuadro aki a revelá mas punto di bista kaminda por yuda e suidadano den kaso di problemátika di debe. E puntonan di bista aki ta impliká por ehèmpel drenta obligashon finansiero serka vários kreditor privá atraves di partisipashon na un konstrukshon di ‘SAM’, kompra di komestibel na toko, pero tambe hasi uso di tienda pa poteká artíkulo etc.
E di dos ròndu di konsulta aki ta un prekursor riba e konferensia tokante aserkamentu di dunamentu di ayudo den kaso di debe problemátiko na Boneiru ku lo tuma lugá na luna di sèptèmber. Aki lo duna atenshon na lei i regulashon, informashon i mediashon, pero tambe interkambio di konosementu entre partnernan di kadena. Pa mas informashon tokante esaki por tuma kontakto via +599 777 4141.