ORANJESTAD, Aruba
E declaracion emiti pa Conseho di Minister di Gabinete Wever Croes diabierna anochi, realmente no tabata ningun sorpresa caminda a informa pueblo cu Conseho a dicidi di kita e cartera di Infrastructura y Medio Ambiente for di Minister Marisol Lopez Tromp y cu e responsabilidadnan aki ta cay awor pa Prome Minister Evelyn Wever Croes.
Desde prome dianan cu Minister Marisol a asumi responsabilidad di e carteranan aki reemplasando ex Minister Otmar Oduber, a surgi situacionnan cu a mustra mesora cu Marisol ta riba un barco su so y kier nabega bay dilanti sin cu e tin cu duna cuenta na Conseho di Minister.
Diferente situacionnan a presenta caminda lo a hala su atencion pa loke el a bin ta haciendo pero simplemente Minister Marisol no tabata presta atencion na e observacionnan aki of no tabata kier pa ningun hende bise algo di loke e kier a haci.
Siendo miembro di partido POR, Marisol simplemente a cuminsa un rumbo di maneho totalmente diferente na loke su lider di partido tabata hibando y riba dje a duna e impresion cu e no ta sirbiendo e rumbo politico di su partido POR mas pero unicamente su propio pensamento politico.
Den oranan di diabierna atardi, caminda Conseho di Minister a reuni pa varios ora, a bin sali na cla cu tin tres Minister sigur cu no kier a traha cu Marisol mas, mirando e forma con su maneho a bin ta creando situacionnan sumamente delicado pa e coalicion actual.
Varios di e Ministernan a bandona e reunion diabierna ultimo y lo a duna di conoce cu nan lo no participa mas na reunionnan di Conseho di Minister si Marisol ta presenta den e reunionnan aki, pues simplemente nan no kier traha cu Marisol.
E decision di Gabinete Wever Croes pa kita cartera for di Minister Marisol ta pone cu e ta keda como Minister sinta pero sin responsabilidad algun y e lo no forma parti mas di e conseho aki.
A trata durante di henter dia pa haya sosten den Parlamento pa legalmente retira Minister Marisol pa medio di un ‘brevet van onvermogen’ pero no tabata sigur cu lo a haya suficiente sosten pa esaki, sigur awor den tempo cu Parlamento ta den reces y no tur hende lo por ta presente den e reunion aki.
Problemanan cu Marisol Lopez Tromp ta bira e di tres situacion di conflicto politico cu su persona ta confrontando mirando cu el a wordo saca for di partido MEP algun aña atras, despues di a tuma un posicion liña recta contra di e vision di su partido.
Marisol a sigui su carera despues den partido AVP caminda el a sufri un caida di miles di voto pero a logra si saca su mes cu voto popular pero a keda bou di e averahe cu el a conoce den su tempo den MEP.
Marisol su permanencia den partido AVP tampoco tabata uno mucho fructifero caminda como Presidente di Parlamento constantemente e no tabata sigui e liña di maneho di e partido y cual relacion a bin termina despues di un conflicto verbal y fisico c’un colega di dje den Parlamento.
Despues di esaki Marisol a uni su mes na partido POR cual partido a wordo forma pa presenta un vision politico nobo cual relacion a dura net tres aña caminda un biaha mas e ta kibra cu e partido despues di casi mesun tipo di conflicto, esta cu ta su vision e ta impone y no esun di e partido.
Awor Marisol ta den otro situacion di conflicto politico cu e partido cu e mes a yuda pa lanta caminda ta keda poco perspectiva pa e por sigui su carera politico a corto plaso.
Tur esaki ta demostra, segun analistanan, cu un hende por ta fout un biaha pero no tres biaha. Pasobra e politico mes a yega di wordo cuestiona hopi durante su carera, entre otro pa terenonan otorga mes.
Diasabra mainta tabatin un reunion programa caminda un comision cu a ser forma pa intermedia den e conflicto lo reuni cu Marisol Lopez Tromp pero en realidad si su persona atende e reunion aki, esey lo ta den calidad di Minister Sin Cartera! E mes ta biahando diadomingo pa Hulanda cu su yiu kende ta bay sigui su estudio na Madre Patria.