Kralendijk, Bonaire
Tur persona biniendo Boneiru ku a sinta banda di un pasahero ku a tèst positivo riba COVID-19 ta bai den karentena. Asin’ei servisio di Salubridat Públiko ta kontrolá ku nan tambe ta haña síntoma.
Un avion biniendo for di Hulanda ku destinashon Boneiru a baha algun pasahero na Kòrsou. Un pasahero ku a tèst na Schiphol a resultá di tin e malesa. E resultado a drenta na Kòrsou ora e avion tabata den laira kaba. Tur persona biniendo Boneiru ku a sinta banda di e persona kontaminá, ta konosí. Nan tur ta bai den karentena na un sitio sentral. Servisio di Salubridat Públiko ta tene nan salú na bista. Asin’ei ta protehá salubridat general na Boneiru.
Promé ku e avion a sali pa Boneiru a limpi’é na Kòrsou sigun e reglanan di corona. Asin’ei a kita e peliger di kontaminashon. Entidat Públiko Boneiru ta enfatisá ku ta importante ku tur pasahero ta hasi un tèst promé nan bai di biahe i tene 1.5 meter di distansia. Ta hasi un yamada na un i tur pa mantené e reglanan di higiena.
