KRALENDIJK, Bonaire
Waf di Chachacha awó ta den su forma nobo pa pueblo por disfrutá di dje.
Waf di Chachacha tin su historia su tras, mirando ku den añanan setenta pa ochenta di siglo pasá hopi hóben ku tabata bai Skol di Ofishi, mihó konosí komo ‘Ambachtschool’ tabata bai landa na Chachacha den nan tempu liber. Na e waf aki hopi hóben di e bario di Rincon tambe a siña landa, manera diputado James Kroon a trese dilanti na reapertura di e waf.
Djárason den oranan di mainta un grupo di hende grandi ku diariamente ta landa na Chachacha tabatin un sukulento desayuno pa asina selebrá reapertura di e waf. Diputado Kroon tambe tabata presente i a felisitá e kompania i su trahadónan pa e bon trabou ku nan a hasi na e waf i e grandinan ku diariamente ta bishitá e waf. Un felisitashon spesial a bai pa kabesante di e grupo sr. Eddy Rijna, kende ya pa 37 aña kaba ta landa na Chachacha. Eddy Rijna den kompania di e grupo i den presensia di diputado a bendishoná e waf ku shampaña.
Diputado Kroon den su diskurso a trese dilanti ku trabounan ta tumando lugá i kada kos ta tuma lugá na su debido tempu. Loke falta ainda na Chachacha ta e parti di e murayanan ku mester fèrf pa asina e área rònt di e waf keda nèchi akabá. Mas aleu diputado a duna di konosé ku dentro di poko lo drecha tambe e Waf di Piskadó na Playa Pabou i e waf na Sorobon, di manera ku tantu piskadó- i usuarionan por hasi uso di e wafnan ei. Pa loke ta trata e kas di piskadó ku tin na Playa Frans, gobièrnu di Boneiru a pone fondonan disponibel pa drecha e kas aki i e ‘slipway’. Finalisando diputado James Kroon a enfatisá ku debidamente gobièrnu tin atenshon pa nos piskadónan.