ORANJESTAD, Aruba
Despues cu Gobierno di Aruba a cera frontera pa mundo henter pa proteha salud di comunidad, despues di 3 luna gradualmente a cuminsa habri e frontera di Aruba bek cu hopi condicion y medida di proteccion.
For di dia 1 di juli 2020 a habri frontera pa e continentente Europeo y region Caribense como tambe paisnan manera Canada. Desde 10 di juli 2020 a habri e frontera pa e mercado mas importante pa Aruba su recuperacion economico y futuro, cu ta e mercado Mericano. E reapertura aki no tawata posibel sin e colaboracion di partnernan clave cu a sa di introduci procedura di siguridad cu ta ser dividi den 3 etapa. Prome etapa ta e procedura prome cu yegada di e bishitante, di dos etapa ta encera yegada di e bishitante na nos aeropuerto y di tres etapa ta encera e bishitante su estadia na Aruba. Pa cada etapa tin protocol cu ta wordo implementa y vigila. Hustamente e implementacion di e diferente protocolnan a conduci na un reapertura exitoso di nos frontera e fin di siman aki.
Duracion di e proceso for di yegada di e bishitante te na su salida di aeropuerto ta aproximadamente 1 ora y 13 minuut . Reacion ricibi for di nos bishitantenan ta hopi positivo. Mayoria ta compronde e motibo di tur medida y ta indica cu nan ta sinti nan mes tambe sigur pa motibo di e medidanan aki. For di dia 10 di juli te cu 13 di juli un totaal di 1423 test a wordo haci na nos aeropuerto, e gran mayoria di bishitante cu a yega Aruba a haci nan test caba den exterior.
E team di DVG y HOH presente na airport a percura pa haci e experiencia na aerepuerto uno mas placentero y profecional posibel pa nos bishitantenan cu mester a pasa door di e screening medico y den caso e covid-19 test tabata aplicabel. Apesar cu e experiencia por ta poco fastioso, nos personal profesional semper ta traha cu cautel y amabilidad pa atende cu nos bishitantenan.
Danki na e colaboracion di diferente partner y actor clave Aruba por ta orguyoso di un reapertura exitoso y continuidad den e proceso di detecta, monitorea y combati e virus di covid-19 na Aruba. Importante ta pa tur hende sigui e protocolnan na tur momento. Keda laba man, keda mantene distancia y tene cuenta semper cu bon hygiena.
Minister Oduber kier a gradici departamento di salud publico (DVG), Setar, ATA, Futura, departamento di immigracion, LabHoh, AAA, Douane Aruba pa e tremendo colaboracion y cooperacion brinda pa Aruba por a habri su fronteranan bek.