ORANJESTAD, Aruba
Diabierna anochi Minister Maduro di Cultura a presencia e premiere di e documentario ‘Atardi’ di Selwyne de Wind cu ta relata e bida di e genio musical di Corsou sr. Rudy Plaate. Cu un bunita introduccion di sra. dr. Joyce Pereira, den e pelicula nos por sera conoci mas di acerca cu sr Rudy Plaate como hoben, como empresario, como esposo y tata di famia y principalmente como autor di e musica cu ta conta nos historia. Atardi ta un di e piezanan mas conoci di sr. Plaate y pesey ta hopi bunita pa mira con sr. Micheal Lampe di Aruba a transforma e cantica clasico aki den un bachi moderno pa asina por percura cu e bunita cantica aki por drenta mente y curason di nos hobennan tambe. Masha pabien na sr. Selwyne De Wind y na full e team cu a haci e grabacion di e documentario aki posibel den e transcurso di e 5 añanan tras di lomba. Danki pa conserva e herencia cultural aki pa nos tur di Aruba, Corsou y Boneiro. Un pabien y un palabra di gratitud na sr. Rudy Plaate pa a sa di deleita nos tur cu su creatividad sin igual y enrikece nos cu musica cu ta conta nos historia y den nos dushi idioma Papiamento. E pelicula Atardi ta corda nos cu nos ta Pueblonan bendiciona cu hopi talento y nos tin un herencia cultural pa sinti nos mes orguyoso di dje. Minister Xiomara Maduro ta extende un invitacion na publico en general pa mira e bunita documentario aki cu ta ser pasa na The Movies Principal na San Nicolaas.
