ORANJESTAD,Aruba
Parlamentario Alan Howell como presidente di e Comision Fiho di Infrastructura y Medio Ambiente den Parlamento a reuni cu e comision di Aruba Offroad Foundation y tambe cu gerencia di Parke Arikok.
E ta indica cu perde mas pan riba mesa no ta conta cu su sosten ‘at all’ y cu apesar cu nos tin cu proteha nos flora y fauna, tempo ta basta dificil caba door di e crisis cu Covid 19 a causa nos. “Mas hende sin trabou no por”. Dentro di poco dia e vehiculonan di ATV y UTV lo no por drenta Parke Arikok mas y esaki logicamente ta un sla grandi pa e companianan unda cu por lo menos 500 persona lo por perde nan trabou y pan riba mesa.
Howell a expresa cu ambos reunion, tanto cu Aruba Offroad Foundation y como cu Parke Arikok a bay den bon ambiente y riba un nivel profesional. Un di e puntonan di Parke ta cu e ATV y UTV ta causa daño na nos naturalesa. Mientras tanto, companianan di ATV y UTV a bisa cu nan ta dispuesto pa respeta tur regla di Parke Arikok, pero pa prohibinan di drenta lo ta un sla duro.
“Nos a logra pone e dos partidonan na mesa bek pa por trece un solucion satisfactorio pa ambos banda.
Mi lo sigui vigila e desaroyo aki di cerca”, Alan Howell a conclui.
