ORANJESTAD, Aruba
Awe mainta Conseho di Minister di Reino a bay di acuerdo conforme proposicion di Gobierno y Minister di Husticia di Aruba mr. Andin Bikker, pa nombra mr. Bote ter Steege como Procurador General di Aruba pa e proximo 3 aña, entrante 1 di september 2020. Mr. Bote ter Steege actualmente ta Hoofdofficier van Justitie na hermana isla Boneiro y tabata tin un carera amplio den Cuerpo Policial di Hulanda prome cu ela cuminsa traha na Ministerio Publico. Gobierno y Minister di Husticia mr. Andin Bikker ta yama bon bini na mr. Bote ter Steege cu su nombracion como e proximo Procurador General di Aruba, y ta gradici mr. Frans van Deutekom pa dirigi nos Ministerio Publico como Procurador General suplente durante e periodo di transicion desde e ultimo Procurador General.
