ORANJESTAD, Aruba
Despues di un trayecto largo di preparacion, recientemente Arubaanse Voetbal Bond (AVB) a lansa e Proyecto di “AVB Academy” den cual coachnan professional ta Brinda sosten y guia na nos futbolistanan den nan desaroyo. E trabounan a desaroya di tal forma cu recientemente a batisa e uniform nobo pa e futbolistanan participando den e programa.
Pa Presidente di AVB, Ing. Richard Dijkhoff, concretisacion di e plannan aki den forma di ehecucion di e Proyecto, ta un satisfaccion grandi. Specialmente pa e hecho cu organisacionnan intencional manera CONCACAF ta siguiendo e pasonan di Aruba di cerca pa por duplica e mesun proyecto exitoso aki riba otro islanan den Caribe y henter Merca, Canada y e continente Centro Americano.
AVB Academy a batisa uniform di e academia U-13. E intencion ta pa tur categoria haya uniform nobo, esta tanto U-13, como U-15 y U-17 pa nan tur por identifica nan mes como hungado di academia di AVB.
Mas cu djis un uniform, cu e proyecto aki, financia 100% dor di AVB mes, e hungado lo por identifica di cua ekipo e ta pertenece. Tambe e ta mustra e parti profesional den cual e federacion ta funcionando. “Abo como hungado, tin algun rekisito cu mester cumpli cu ne,” asina Presidente di AVB a expresa.
Pa directiva di AVB esaki ta un momento masha importante y yen di orguyo combina cu satisfaccion. Pocopoco comunidad ta aprecia e esfuersonan grandi cu e federacion a realisa e ultimo añanan, pa awor por cosecha tur e frutonan. No solamente na nivel local, pero tambe na nivel regional unda e planta hopi simiya cu awor ta cosechando.