ORANJESTAD,Aruba
Entrante di e siman aki TUI por bula atrobe pa e islanan di Kòrsou, Aruba i Boneiru. 2 di yüli, dia di bandera di Kòrsou, TUI ta bula pa promé biaha pa Kòrsou. E promé buelo pa Boneiru lo ta riba 9 di yüli i e promé buelo pa Aruba lo ta 11 di yüli 2020. Esaki ta un tremendo notisia pa tur turista ku tin e destinashonnan aki komo nan destinashon di vakashon faborito. Di otro banda esaki ta un bon notisia tambe pa yunan di tera i pa Hulandesnan Europeo ku ta biba na ambos banda di oséano ku pa motibu di e medidanan di prevenshon di Corona vírùs a haña nan obligá di keda separá di nan famia i amistatnan. TUI ta sumamente kontentu di por biaha atrobe i ta deseá di por kompartí e alegria aki ku algun persona ku porfin nan por reuní ku nan famia.
Dia 2 di yüli un buelo di Boeing 787 Dreamliner di TUI fly yen di pasahero ta biaha di Amsterdam pa Kòrsou. Riba e buelo aki tin entre otro turistanan, pero tambe pasaheronan ku porfin por bishitá nan famianan i amistatnan. Corona vírùs a afektá hopi hende, esaki a nifiká entre otro ku nan no por a kompartí momentunan di alegria ni tampoko di tristesa huntu ku nan sernan kerí. P’esei nos a buska algun hende ku nos por a hasi kontentu ofresiendo nan un biahe pa Kòrsou òf un biahe for di Kòrsou pa Hulanda. Porfin bo por brasa bo ruman muhé, porfin bo por mira bo tata. Esakinan ta historianan ku ta toka nos tur. Carmen ta un di e personanan aki, bishitá su famianan tabata e ‘highlight’ di tur aña. Lástimamente ya pa dos aña esaki no tabata posibel pa motibunan personal i e aña aki e brote di Corona vírùs no a resultá faborabel.
Bishitá Kòrsou semper ta pone un sonrisa riba kara di hende, hopi turista ta ansioso pa por bolbe disfrutá di e playanan bunita, bon restorantnan i e laman blou kristalino. Tabata tristu i difísil mira asina tantu luna sin turista. Pero ta hopi bon ku awor nan por wòrdu risibí kalurososamente atrobe. E buelonan pa nos islanan, Kòrsou, Aruba i Boneiru, ta trese felisidat pa hopi pasahero i na mes momentu esaki ta duna un impulso na e ekonomia lokal.
TUI tin un konekshon estrecho ku nos islanan i tin kantor propio na Kòrsou i Aruba, kaminda 90 kolega ta traha. TUI ta konsiente ku e lunanan tras di lomba tabata pisá pa e habitantenan di e islanan. Tabata TUI su deseo pa yuda algun persona pa re-enkontrá ku nan famia. Pa e motibu ei algun pasahero a bini Kòrsou riba invitashon di TUI riba e promé buelo, pa bishitá nan famia na Kòrsou òf hustamente na Hulanda.