KRALENDIJK, Bonaire
Gerensia di WEB Bonaire N.V. (WEB) a entregá e reportahe anual 2019 na Kolegio Ehekutivo den su kalidat di akshonista.
E reportahe anual, akompañá pa un deklarashon di akòuntent, ku echo, sifra i informashon di fondo ta ilustrá kon e kompania di gobièrnu den 2019 a bolbe desaroyá su mes pa loke ta trata profeshonalidat ku un resultado operashonal positivo komo konsekuensia. Entretantu Kolegio Ehekutivo formalmente a aprobá e kuenta anual den un reunion di akshonista.
Na momentu di risibí e dokumentunan diputado Elvis Tjin Asjoe kende ta responsabel pa entidatnan di gobièrnu a duna gerensia di WEB un kòmplimènt pa e manera profeshonal ku e kompania ta aktua. ‘Ora ta trata di good governance WEB ta kana dilanti dentro di e grupo di kompanianan di gobièrnu. No opstante e preshon èkstra pa motibu di e krísis di corona a ofresé e kuenta anual mas ku na tempu. Lamentablemente no por bisa esaki di tur kompania di gobièrnu, pues laga WEB ta e bon ehèmpel pa otronan’, sigun e diputado.
‘Pero por lo ménos mes importante ta e prestashonnan pa loke ta trata dunamentu di servisio na siudadanonan i empresanan. Gerensia i empleadonan tin motibu pa ta orguyoso. Danki na un bon koperashon ku partnernan stratégiko i un meskla di bon medida i invershon na tempu, ya pa sinku aña kaba no a surgi niun blèkòut mas. E enfoke di tur hende ku ta traha na WEB ta dirigí riba ofresé siguridat di entrega kontra tarifanan mas abou posibel, miéntras ku tin atenshon tambe pa sostenibilidat.’
Teniendo kuenta ku e kódigo di Corporate Governance insular tin kestion di un koperashon transparente i efektivo di WEB ku Kolegio Ehekutivo, e ministerionan di Asuntunan Ekonómiko i Klima (EZK), Infrastruktura i Maneho di Awa (I&W) i Asuntunan Interno i Relashonnan den Reino (BZK) ku ta kontribuí ku un supsidio anual na tarifanan pagabel pa awa i koriente, i otro partnernan.
