ORANJESTAD, Aruba
Siman pasa a tuma lugar e sorteo di e grandioso rifa di Rotary Club Aruba. Apesar di e situacion cu nos isla ta pasando aden y mirando cu e feria di Fiesta Rotaria mes no a bai door e aña aki, toch e benta di rifa a bai hopi mas mihor cu Rotary Club Aruba a spera, danki na e sosten masal di e comunidad di Aruba.
E benta y sorteo di e rifa a contibui na un suma total di AWG 264.000,- cu a wordo reparti bao di diferente fundacionnan den nos communidad. Durante un anochi ameno Presidente di Rotary Club Aruba, América Barrios, a hasi entrega di e fondonan na e differente fundacionan, entre otro: Kibrahacha 60+, YMCA, Casa Cuna Progreso, Koninging Wilhelmina Kankerfonds, Aruba Demolay, Aruba Rainbow Girls, Ban Uni Man Pa Cria Nos Muchanan, Grupo Scout Sonrisa, Hende Muher den Dificultad, Edmund Harms Foundation, Arubaanse Padvindsters Gilde y Stichting Reclassering en Jeugdbescherming. Na final a gradici tur e fundacionan cu tin un tarea clave den nos comunidad.
Presidente América Barrios kier a duna danki un biaha mas na tur esnan cu a aporta y a cumpra rifa. Tambe un gradicimento na tur nos sponsors comercial pa nan contribucion. Un danki special na miembronan di Rotary Club Aruba, Rotaract Club Aruba, Interact Club Aruba Schakel College y Interact Club Colegio Arubano cu a yuda bende rifa pa asina por a recauda e bunita suma aki.
Nos ta conta cu bo(so) contribucion atrobe otro aña, asina President América Barrios a comenta.