ORANJESTAD, Aruba
Practicanan di bon gobernacion ta encera entre otro ta transparente y brinda informacion necesario na otro pa por tuma un decision. Nos ta tuma nota cu Hulanda no sa kico esaki kiermen. Nan ta condiciona yudansa di likidez na un entidad nobo sin brinda informacion necesario. Diripiente nan ta vocifera nan deseo pa condiciona yudansa di likidez na obliga Aruba pa acepta un ley di Reino pa supervision financiero, y esaki despues cu CAFT mes a conseha positivo pa Aruba por haya e fianza necesario.
PREGUNTANAN CU TA SURGI
Kico ta bira e tarea di e entidad aki? Kico ta e base huridico pa ancra un entidad asina na Aruba? Te ki dia e entidad aki lo existi? For di fuentenan informal nos tin entendi cu e entidad aki lo mester maneha e recursonan cu ta wordo fia aworaki. Pero si e recursonan aki ta wordo uza mesora pa e obligacionan coriente, y cada biaha mester fia pa e lunanan nos dilanti, y CAFT a indica cu Gobierno ta ehecuta e condicionnan mara na e fianza manera debe ser, dicon toch ta insisti pa bin cu un entidad?
TELEFONICAMENTE KIER INTRODUCI UN RIJKSWET
Cu ki seriedad Hulanda ta actua aworaki den Reino? Telefonicamente kier informa nos prome minister sra. Evelyn Wever-Croes y presion’e pa bay di acuerdo cu un ley di Reino. Nan kier impone un cambio estatal, duna Aruba solamente 3 dia pa delibera riba esaki, no ta pone nada por escrito, y esaki a cambio di yudansa di likidez cu mester pa cubri FASE, Loonsubsidie y “voedselpakket”. Esaki ta ehempel bibo di maluza un situacion di crisis pa conkista un pais!
SEGREGA Y INSTIGA
Ta di lamenta cu Parlamentarionan di AVP ta sigui instiga y crea segregacion. Pero mes importante mi ta haya pa señala cu partidonan politico cu no ta representa den Parlamento mester informa ciudadanonan corecto. Pasobra malinforma pueblo riba e situacion actual, tambe ta crea segregacion y esey tambe ta populista.
PARTIDO MEP
Partido MEP su conseho di partido a declara di no ta di acuerdo cu e condicionnan proponi pa Hulanda. Mirando cu nan ta inapropia, y un momento di crisis no por wordo maluza pa cambia un constelacion di estado di un pais autonomo. Conseho di partido a haci un peticion na lider di MEP, alaves Minister Presidente, pa sigui dialoga cu Hulanda pa por cambia e condicionnan y presenta otro propuestanan na lugar di e “Rijkswet Financieel Toezicht”. Desde 2017 Gabinete Wever-Croes a comproba di por maneha y atende cu su finanzas publico na un manera responsabel y a cumpli tambe cu e rekisitonan pa por a haya fiansa den tranche 1 y 2.
PA CONCLUI
Otro siman dialuna lo tin un reunion Tri-Partite entre e Parlamentonan di Aruba, Corsow y Sint Maarten. Kinan lo fiha un punto di salida, bin cu resolucion y manda señal internacional cu no por maluza un crisis pa conquista un pais.
