ORANJESTAD,Aruba
Parlamentario Endy Croes ta amplia riba un tema actual den boka di pueblo esta un Ley di castigo minimo pa esnan cu comete abuso contra mucha. Manera a splika promer cu esaki cu diabierna ultimo Parlamento a aproba e aumenta di e castigo maximo den caso di violacion di 12 pa 15 aña. A splika cu esaki ta promer pasonan di diferente recomendacion pa asina bringa e fenomeno di entreotro abuso di mucha. Lokual hopi hende a trese dilanti dicon no a bini cu un ley pa reglamenta un castigo minimo pa abusadornan y awe lo splika e rasonnan pa cu esaki.
Ley di Castigo Minimo a haña Dictum 5 na Raad van Advies:
Parlamento anterior desde 2010 a traha riba un concepto di ley cu e pensamento pa introduci un castigo minimo pa esnan cu comete abuso contra mucha. E concepto di ley aki no a haña un bon conseho di Raad van Advies. Desde 2018 partido partner den Coalision a sigui traha riba esaki y a encamina e proceso di nobo pero e ley di castigo minimo presenta a haña un Dictum 5 di Raad van Advies como resultado. Kiko esaki ta ensera? Un Dictum 5 di Raad van Advies riba un concepto di ley kiermeen cu Bo no por presenta e ley aki na Parlamento. Raad van Advies ta duna Dictum 1 te cu 5 es decir un 5 kiermeen cu practicamente mester hasi hopi cambio of redraft e ley por completo.
Kiko ta e argumentonan di Raad van Advies:
Raad van Advies su agrumentonan pa cu un ley di castigo minimo ta lo siguiente. Nan precupasion ta cu e magistrado esta e Hues lo bay pensa dos biaha si e ta duna e castigo minimo of bay over na vrijspraak. Esaki ta condusi cu sea Bo ta bay sera por ehempel si e ley di castigo minimo ta stipula 4 aña minimo, es decir Bo ta bay sera 4 aña of sea Bo ta sali liber. Pues Hues no tin otro choice. Pues un sospechoso por wordo condena na 4 aña cu un ley di castigo minimo asina sin kisas cu berdaderamente e ta culpabel of visa versa un sospechoso cu enrealidad ta culpabel por haña vrijspraak y keda den libertad si Hues no a wordo suficientemente convensi.
Hardheidsclausule al estilo Hulanda:
Awor ta evaluando pa bin cu un hardheidsclausule al estilo cu Hulanda a introduci den un wetsontwerp na 2012. Esaki ta duna e magestrado esta un Hues e posibilidad dado caso cu pa rasonan cu e Hues ta sinti cu no por aplica e castigo minimo cu e ley ta prescribi e por desvia di esaki dunando menos castigo cu e castigo minimo. Lo mester bin cu un grondregel unda cu bon argumentacion bij hoge uitzondering lo desvia di e Ley. Algo asina kisas por contruibi pa e futuro Ley di castigo minimo por slaag na Raad van Advies cu un mihor Dictum y wordo presenta na Parlamento. Parlamentario Croes kier ilustra cu ta trahando riba esaki tambe pero esaki no kiermeen cu introducion di un ley asina nos a logra e obhetivo final. Manera a bin ta bisa ta un serie di cosnan hunto nos tur mester hasi pa logra proteha nos muchanan. Corda cu 90% e acto ta wordo cometi di un hende serca di e famia.
Evalua Castigo Minimo riba residivista:
Desde 2010 y alaves na 2016 a bini recomendacionnan di diferente trabounan hasi pa varios comision riba e tema aki pa introduci castigo minimo riba residivista. Pues un persona cu den pasado a wordo condena pa un crimen similar y bolbe cay den man di husticia cu e persona ey si ta bin imediatamente na remarke pa e castigo minimo di acuerdo cu un futuro ley. Pues terminando ta bon pa keda splika pueblo cu ta trahando riba hopi cos pareew pa frena e parti di abuso di mucha pero no solamente ley(nan) lo resolve e problema alinstante pero ta un trabou den conhunto invulcrando tur hende. Cuminsando cu programmanan di prevension desde cas y school, back office bon equipa cu vertrouwenarts, psicologo, zeden politie, camara room, rape test. Kibra e taboe y tin e curashi pa entrega keho mesora “tijdelijk” di casonan asina. Un investigacion profundo y corecto door di proficionalnan den combinacion cu prueba y un bon rapport ta di vital importancia. Asina nos por logra baha casonan di abuso y alaves haña condenanan halto pa esnan culpabel.