ORANJESTAD,Aruba
Un rapport traha riba Serlimar, porcierto door di e compania Grant Thornton, ta duna un analisis profundo di e situacion malo di Serlimar.
Den un di e seccionnan ta mustra e acuerdonan cu a cera cu Serlimar y Atco. Un contracto unda cu di un banda Serlimar mester a paga EcoGas pa haci cierto trabou pa procesa e sushi pa nan na Ser’e Teisji, pero EcoGas di su banda mester paga Serlimar pa haci uzo di e area na Seri Teisji cu Serlimar tin esaki bou di su maneho. Aki por mira cu Serlimar no a sali beneficioso pasobra e aña’ki te cu luna di juni, ya caba Serlimar mester a paga casi un miyon florin na e compania priva.
E ariba menciona sigur a contribui cu no por a controla e gastonan mensual di SERLIMAR.
Pa algun aña caba Gobiernonan a hunga, pa ki motibo no ta conoci, cu loke mester ta e entrada fiho Serlimar cu ta e cobransa pa recoge sushi na cas. Ni na momento cu Gobierno a dicidi dado momento cu nan ta bay cubri e tarifa aki pa pueblo no pague, a resulta cu Gobierno no a cumpli cabalmente.
Den tur e añanan cu esaki ta vigor nunca a logra cu e pueblo ta cumpli 100% cu pago di e tarifa di 25 florin pa luna. Ultimo e cumplimento no tabata yega ni 30% cu ta haci e sobrivencia di Serlimar dificil. Aworaki Serlimar tin un debe di 41 miyon florin cu no sa ta bay cumpli cu ne. Husto aworaki cu e situacion ta dificil na Aruba di repente por scucha voznan ta lanta pa subi e tarifa di 25 ap 35 florin pa luna. E pregunta ta: Pakico? Pasobra e compania priva cu ta haci e mesun tipo di trabou a dicidi di subi su tarifa na 35 florin. Pakico no a haci esey di cuminsamento sino te awo. Kier hinca Serlimar den mas problema cu e consecuencia cu e ta bati bancarota? Esey lo nifica cu automaticamente e servicio di recoge sushi ta bay den mannan priva.
Por a scucha ultimo simannan hopi di tur loke ta pasando na Serlimar y tur loke ta bay wordo haci. E decision tuma pa pidi Suspension di Pago a wordo cuestiona for di prome instante. E aumento di cobransa lo no haci Serlimar mas competitivo sino lo coba e buraco pa caba di sink e barco aki
