KRALENDIJK, Bonaire
Kolegio Ehekutivo awe riba proposishon di diputado Elvis Tjin Asjoe di Asuntunan Ekonómiko i Turismo a disidí pa eksplorá kiko ta e posibilidatnan pa hasi Boneiru mas aktraktivo pa ekoturismo. E medionan ekonómiko mas prinsipal di nos isla ta naturalesa, espasio, trankilidat i outentisidat. Nan ta determinante pa prosperidat i bienestar di nos pueblo ku pa un gran parti ta dependiente di turismo pa su entrada.
E kresementu no por kontinuá sin restrikshon. Pa e motibu aki Kolegio Ehekutivo ta boga pa un transishon di turismo masal pa turismo di kalidat, den liña ku e Plan Stratégiko pa Turismo i e konsepto di Blue Destination. E krísis di corona ta un motibu èkstra pa aselerá e proseso aki: turismo internashonal lo tin mester di basta tempu pa rekuperá su mes, kaminda destinashonnan ku ta ofresé bishitante trankilidat, espasio i naturalesa ta preferente serka biahero ku eksigensia haltu pa nan vakashon.
Turismo na Boneiru ta konsentrá riba e parti di kosta. Plamamentu di turismo di estadia ta pas den e époka despues di corona, pero ta konektá tambe ku e ambishon for di e Plan di Maneho pa Naturalesa i Medio Ambiente Hulanda Karibense 2020-2030: ‘Konservá i protehá naturalesa i hasi uso di esaki na un manera sostenibel komo aporte na desaroyo ekonómiko.’
Kolegio Ehekutivo ke kuminsá un diskushon ku stakeholdernan den turismo i organisashonnan di naturalesa tokante un posibilidat pa duna kontenido konkreto na e ambishon akí ku ta pas den e komunidat sostenibel ku Boneiru ke ta, konektá ku e Plan Stratégiko pa Turismo, aselerá e transishon deseá pa turismo di kalidat, ku ta generá empleo nobo i ta na bienestar di naturalesa.
Boneiru ta disponé di relativamente hopi paisahe ku balor grandi. Na algun anterior plantashi no ta desplegá òf práktikamente no ta desplegá aktividat. Por utilisá nan perfektamente pa desaroyo pa turismo sostenibel, hasiendo esaki na un manera ekológiko responsabel i hasiendo e lugánan aksesibel pa metanan rekreativo turístiko.
Un opshon ku Kolegio Ehekutivo den konsulta ku interesadonan ke investigá si e ta faktibel, ta pa selektá áreanan ku ta bini na remarke pa esei pa seguidamente pone nan bou di protekshon legal, lanta kurá rònt di nan, deshasí di kabritu i buriku, diseñá ruta pa kana i kore baiskel i establesé un ekohotèl di eskala chikitu ku ta produsí su mes koriente i ku ta konstruí ku material sostenibel.
E bentahanan tras di otro:
– Boneiru ta hasi su mes mas atraktivo pa bishitantenan ku konsientemente ta skohe pa un destinashon sostenibel ku ta ofresé trankilidat, espasio i outentisidat i ku ta dispuesto pa paga mas pa esaki.
– Plamamentu di turismo di estadia ta konektá ku e eksigensianan ku ta pone pa turismo den e époka despues di corona, pero ku alabes ta hasi Boneiru mas atraktivo pa turistanan ku no ta enfoká riba bich i laman.
– Empleo alternativo pa forsanan laboral ku ta(bata) gana nan pan ku turismo krusero.
– Mihó maneho di naturalesa i ampliashon di posibilidatnan rekreativo pa nos poblashon lokal.
– Prevení desaroyonan indeseá den áreanan ku balor di paisahe.