ORANJESTAD,Aruba
Plataforma Hobennan Professional den transcurso di simannan ta enfocando hopi riba informa nos comunidad over diferente temanan huridico na un manera mas simpel y comprendibel cu ta posibel. Di e forma aki nos ta cumpliendo cu nos compromiso di informa nos comunidad y alabes duna contenido na nos mission como organisacion di hobennan professional brindando asistencia huridico social den forma gratuito. Den e articulo anterior nos a informa cu banda di haya e nacionalidad Hulandes van rechtswege tin dos otro forma pa adkiri nacionalidad Hulandes, cual ta mediante naturalisacion of optie. E articulo aki tin como meta pa analisa e criteria relaciona cu optie. Nos kier remarca cu adkiri e nacionalidad Hulandes mediante un optieverklaring ta un procedura relativamente simpel cu lo por tuma lugar den un periodo cortico. Ta consehabel pa prome cubo persona considera e opcion pa adkiri nacionalidad Hulandes mediante naturalisacion, pa investiga y evalua promer si bo persona ta cumpli cu e rekisitonan pa bini na remarke pa adkiri nacionalidad Hulandes mediante optieverklaring.
Rekisitonan pa por adkiri nacionalidad Hulandes mediante optie
Pa un persona por bini na remarca pa adkiri e nacionalidad Hulandes mediante un optieverklaring tin algun rekisito estricto cu e persona mester cumpli cune. E rekisitonan ta formula den art. 6 RWN. Ta importante pa menciona cu unabes bo persona adkiri nacionalidad Hulandes, bo persona mester ta dispuesto pa tuma distancia dibo nacionalidad actual.
E prome rekisito ta cu e persona mester tin un status legal. Un persona tin un status legal ora e tin admision na Aruba conforme un permiso di residencia pa tempo defini of indefini. Na di dos lugar e persona no mester a comete ningun echo castigabel pa ley den e periodo di 5 aña promer cu e peticion pa adkiri nacionalidad Hulandes mediante optie wordo entrega. Si acaso e persona tin un caso penal pendiente pa wordo trata, su persona no ta bini na remarca pa adkiri nacionalidad Hulandes mediante optie. Nos ta pone enfasis riba e hecho cu e rekisitonan aki ta acumulativo nificando cu mester cumpli cu tur.
Banda di e rekisitonan ya menciona e persona su circumstancianan mester califica na un di e categorianan menciona den art. 6 RWN. Den e articulo aki nos ta menciona algun scenario cu kizas lo ta esunnan mas interesante pa esnan na Aruba. Pa un lista no limitativo cual ta contene tur e categoria nan nos ta referi na articulo 6 RWN den su totalidad. Akibou nos ta menciona algun:
- E persona mayor di edad cu nacionalidad stranhero cu status legal cu a nace na Aruba y cu desde su nacimento ta bibando na Aruba (art. 6 inciso 1 sub a RWN);
- E persona menor di edad cu nacionalidad stranhero cu a wordo reconoci door di un Hulandes y cu no a bira Hulandes segun art. 3 of 4 RWN, pero cu prome cu a haci e peticion di optie a wordo cria y educa door di un Hulandes durante por lo menos 3 aña sin interupcion (art. 6 inciso 1 sub c RWN);
- E persona mayor di edad cu nacionalidad stranhero cu desde su edad di 4 aña ta residencia legalmente na Aruba (art. 6 inciso 1 sub e RWN);
- E persona cu nacionalidad stranhero cu tin 15 aña legalmente residencia(sin interupcion) na Aruba casa cu un persona Hulandes minimo 3 aña (art. 6 inciso 1 sub g RWN);
- E persona cu tin 65 aña di edad y alabes a residencia 15 aña continuamente (sin interupcion) na Aruba basa riba un status legal (art. 6 inciso 1 sub h RWN).
Procedura optieverklaring
Den comparacion cu e procedura di naturalisacion nos por comenta cu e procedura di optie ta hopi mas simpel. Si acaso e persona ta cumpliendo cu e rekisitonan menciona y ta califica den un di e categorianan menciona den art. 6 RWN e por acudi na kabinete di Gobernador. Na kabinete e ta yena e formulario Optieverklaring alabes ta entrega esaki conhuntamente cu otro documentonan relevante.
E proposito di e documentonan ta prueba cu e persona encuestion ta cumpli cu tur rekisito pa ricibi e nacionalidad Hulandes. E documentonan aki ta por ehempel permiso di estadia, acta di matrimonio of documento(nan) di censo. Gobernador lo evalua e peticion y alabes hasi e investigacion necesario. Informacion relaciona cu estadia legal lo por wordo verifica cu por ehempel Dimas. Gobernador lo informa por escrito na e persona si su peticion a wordo honra of nenga basa riba e informacion cu e persona a suministra.
Pa ricibi un contesta riba e peticion mester tene cuenta cu un periodo di 3 luna. Si e persona cu a haci e optieverklaring ta cumpli cu tur rekisito menciona, gobernador lo confirma e peticion. Si tur cos ta na ordo e persona lo wordo invita pa un ceremonia formal den cual e lo mester hasi un declaracion di laso cu e comunidad Hulandes. Despues di e formalidad aki e persona oficialmente a adkiri e nacionalidad Hulandes.
Tienda di ley lo kier informa comunidad di Aruba cu lo reanuda su servicio na nos comunidad den e luna di Juli benidero. Nos ta anima tur persona pa keda pendiente pa mas informacion relaciona cu continuacion di Tienda di ley. Mientrastanto por tuma contacto cu nos pa medio di nos pagina di Facebook. Nos ta ancioso pa reconecta y alabes brinda servicio huridico na nos comunidad. Tienda di ley ta anima tur persona pa respeta autoridad y cumpli cu decreto emiti pa autoridad. Ban mantenene nos mes na e norma(nan) di distanciamento social.
Scirbi pa studiantenan di Ley:
Wendrick Cicilia
Gerick Croes LL.B. ,B.ec