ORANJESTAD,Aruba
E consecuencianan di e pandemia Covid-19 por wordo sinti tur caminda. E impacto den e parti Caribe di Reino ta significante. E islanan ta depende grandemente di turismo a wordo afecta inmensamente riba tereno di economia. Desempleo riba e islanan ta aumentanto liher, y casnan ta cay bou nivel di pobreza. Tin un necesidad urgente pa asistencia di emergencia.
Hulanda a pone 16 miyon Euro disponibel pa Aruba, Korsou y St. Maarten. E fondo cu a wordo poni disponibel pa Aruba ta wordo usa pa provee casnan den situacion mas vulnerabel cu cuminda pa asina e necesidad basico wordo cubri. E necesidad ta halto y inmediato. Ta importante pa usa unred di organizacion capabel y liher. Esaki ta pakiko Gobierno di Hulanda a apunta Nederlandse Rode Kruis pa coordina y duna asistencia hunto cu e otro organizacionan local di ayudo riba e islanan.
Nederlandse Rode Kruis como e “Grant Manager’ apunta pa BZK a pidi Cruz Cora Aruba busca partners pa por traha den e proyecto grandi aki. Diaranzon, 18 di juni, 2020 a firma e acuerdo di colaboracion aki entre e partners: Cruz Cora Aruba, CEDE Aruba y Fundacion Pa Nos Comunidad.
Cruz Cora Aruba y CEDE Aruba tambe a firma un acuerdo separa y lo fungi como “coordinating partners” y por wordo acerca pa cualkier pregunta of peticion tocante colaboracion cu otro instancia.
Presente na e momento importante aki tabata representantenan di Vertegenwoordiging van Nederland in Oranjestad-Aruba, Fundacion Pa Nos Comunidad, CEDE Aruba y Cruz Cora Aruba.
E Proyecto aki lo wordo ehecuta entre 18 di juni – 18 September, 2020 y tin como meta pa duna asistencia na 5000 famia mas vulnerabel den nos comunidad cu cuminda y producto di hygiene
