KRALENDIJK,Bonaire
Entrante 3 di aprel 2020 Kolegio Ehekutivo a baha e preisnan máksimo di kombustibel na pòmp di gasolin konsiderabelmente. Pa Curoil i e pòmpnan di gasolin na Boneiru tambe e medidanan ku a tuma relashoná ku e pandemia di Covid-19 tin konsekuensia grandi. Benta di kombustibel no-regulá na aeropuerto pa un gran parti a kai afó. Entrada riba benta di kombustibel regulá tambe a bai atras un tiki.
Banda di e medidanan pa redusí gastu e distribuidornan mester a tuma medida adishonal pa sigui garantisá distribushon di kombustibel na Boneiru. Boneiru tin un interes pa loke ta trata kontinuidat di suministro di kombustibel. Mirando e sirkumstansianan aki Kolegio Ehekutivo no a baha preis di kombustibel regulá den luna di mei i yüni mas tantu. Entre Curoil i Kolegio Ehekutivo a hasi palabrashon pa forma un komishon ku ta konsistí di eksperto ku komo meta: bini ku un mekanismo di preis transparente i duradero ku ta garantisá kontinuidat di suministro (por lo tantu ku un rendimentu rasonabel pa e distribuidornan).
Pa vários desena kaba ta regulá preis di kombustibel na Boneiru. Regulashon ta konta pa preis na pòmp i pa preis di LPG pa uso no-komersial. Loke no ta regulá ta kerosin na aeropuerto, kombustibel den nos hafnan pa yate i LPG pa usuarionan komersial. E preisnan regulá ta basá tambe riba proposishonnan mensual di Curoil kaminda nan ta inkluí preis promedio di riba merkado i komponentenan fiho (márgen, akseins i ABB), hasiendo uso di un método fiho di kalkulashon. Tur luna un ofisina eksterno di akòuntent ta validá e kalkulashonnan di preis di Curoil i ta presentá nan pa aprobashon na Entidat Públiko Boneiru den e rapòrt ‘Correctiefactor – faktor di korekshon’. Direktorado di Planifikashon i Desaroyo di Entidat Públiko Boneiru seguidamente ta duna konseho na diputado di Asuntunan Ekonómiko tokante e método di stipulashon di preis di produktonan regulá. Kolegio Ehekutivo ta tuma e desishon definitivo tokante preis di benta.
Na luna di novèmber 2018 a manda un proposishon tokante ahuste di e márgennan di ganashi pa Kolegio Ehekutivo i resientemente partidonan a logra un akuerdo tokante kon pa atendé ku e problemátika aki. A instituí un komishon ku enérgikamente a kuminsá traha riba e tarea aki komo parti di e tarea total, pa mas tardá riba 15 di yüni hasi un proposishon pa un solushon temporal pa e problemátika aktual rònt di preis di kombustibel. Seguidamente un supkomishon pa mas tardá 1 di yüli lo hasi un proposishon pa solushoná e problemátika di márgen. Un di dos supkomishon pa mas tardá 15 di yüli lo hasi un proposishon pa un mekanismo transparente di stipulashon di preis
