ORANJESTAD,Aruba
Durante conferencia di prensa di Gobierno di Aruba, Sharline Koolman, Crisisleider di DVG a anuncia cu ‘Kidscamp’ lo ta permiti den e vakantie benidero.
Pa contesta hopi pregunta cu a ricibi tocante “Kidscamp” cu ta actividadnan cu ta sosode tur aña den temporada di vakantie, Sra. Koolman a duna di conoce cu e ‘Crisis Team’ diaranson atardi a dicidi cu e activadnan aki pa nos muchanan lo por sosode manera tur aña sinembargo mester tene cuanta cu algun regla vigente.
Pa muchanan te cu 12 aña, distanciamento social y fisico por ta menos. No mester bay den panico si esaki no sosode. Pero si e parti di higiene, labamento di man, mester sigui tene cuenta cu ne mescos ta den e caso di scolnan.
Pa esnan di 12 pa 18 aña, Sra. Koolman ta conseha pa sigui stimula distanciamento social y fisico hopi mas pasobra e grupo aki ta compronde e informacion miho di kico ta pasando. Labamento di man constantemente ta keda necesario.
E malesa aki ta manifesta su mes hopi menos den e categoria di edadnan aki y no ta duna e mesun problema di salud. Pa e motibo aki ‘Crisis Team’ ta aproba pa instancianan organisa e actividadnan di ‘kidscamp’ den e temporada di vakantie ya cu esaki ta bon pa e salud mental y emocional di e hoben.
Sra. Koolman ta enfatisa cu e luganan cu normalmente ta haya bishita di e hobennan durante e actividadnan aki, mester tene cuenta cu reglanan vigente. Pero e conseho ta keda pa instancianan regla salidanan mas tanto posibel na luganan di naturalesa.
